Njëzet shtetas britanikë kanë nisur një periudhë 45-ditore izolimi në Mbretërinë e Bashkuar pasi u evakuuan nga anija turistike MV Hondius, e goditur nga një shpërthim i hantavirusit.
Pas mbërritjes me një fluturim çarter nga Tenerife në aeroportin e Manchesterit të dielën, ata janë vendosur në spitalin Arrowe Park Hospital në Merseyside, ku do të qëndrojnë për 72 orë nën monitorim. Më pas, do t’u kërkohet të vetëizolohen edhe për 42 ditë të tjera në shtëpi.
Sipas autoriteteve britanike të shëndetit, të gjithë të evakuuarit janë aktualisht në gjendje të mirë dhe pa simptoma.
Shpërthimi në anijen turistike ka shkaktuar tre viktima, ndërsa dy raste të konfirmuara të hantavirusit janë regjistruar te shtetas britanikë që po trajtohen në Holandë dhe Afrikën e Jugut. Gjithashtu, një shtetas amerikan dhe një francez kanë rezultuar pozitivë pasi u kthyen në vendet e tyre.
Ekspertët kanë sqaruar se shumica e formave të hantavirusit nuk transmetohen nga personi te personi, por varianti Andes – i identifikuar në disa pasagjerë të kësaj anijeje – mund të përhapet mes njerëzve.
Autoritetet britanike theksuan se rreziku për publikun mbetet “jashtëzakonisht i ulët”, ndërsa procesi i testimit dhe gjurmimit të kontakteve vijon.
Pasagjerët në izolim do të qëndrojnë në ambiente të veçanta me mbështetje mjekësore dhe psikologjike, pasi shumë prej tyre u larguan nga anija vetëm me sendet bazë dhe konsiderohen të traumatizuar nga përvoja.
Ndërkohë, një britanik i dyshuar për infektim ndodhet në izolim në ishullin e largët Tristan da Cunha, ku ushtria britanike ka dërguar personel mjekësor për ndihmë.
Anija MV Hondius, që nisi udhëtimin në Argjentinë më 1 prill me rreth 150 pasagjerë dhe anëtarë ekuipazhi nga 28 vende, pritet të dërgohet në Rotterdam për dezinfektim të plotë.
