Administrata Kombëtare për Radio dhe Televizion ka bërë të ditur nëpërmjet një deklarate se mbulimi i BBC World News në Kinë ka shkelur kriteret e raportimit të drejtë dhe të paanshëm, si dhe se ka rrezikuar interesat kombëtare dhe solidaritetin etnik në Kinë
Pekin, 11 shkurt (AP) – Autoritetet në Pekin kanë ndaluar transmetimin e BBC World News në territorin e Kinës, vetëm një javë pasi që vendi është kërcënuar me kundërpërgjigje ndaj revokimit të licencës së transmetuesit britanik për transmetuesin shtetëror kinez CGTN.
Administrata Kombëtare për Radio dhe Televizion ka bërë të ditur nëpërmjet një deklarate se mbulimi i BBC World News në Kinë ka shkelur kriteret e raportimit të drejtë dhe të paanshëm, si dhe ka rrezikuar interesat kombëtare dhe solidaritetin etnik në Kinë.
BBC-ja në përgjithësi nuk mund të ndiqet nëpër Kinë, jashtë disa hoteleve, bizneseve dhe vendbanimeve të parapara për të huajt. Nuk dihet ende nëse ndalesa do të përfshijë edhe këto lokacione.
Qeveria kineze kishte kritikuar qysh më herët BBC-në lidhur me raportimet e saja për pandeminë COVID-19 në Kinë, si dhe rreth raporteve për abuzimet seksuale dhe punën e detyrueshme në rajonin e Xinjiangut, ku shumicën e popullatës e përbëjnë ujgurët dhe grupet e tjera kryesisht myslimane.
“Kanali nuk i përmbush kriteret e nevojshme për t’u transmetuar në Kinë, si një kanal i huaj”, ka bërë të ditur Administrata kineze për Radio dhe Televizion, duke shtuar nuk do ta pranojë aplikimin e transmetuesit britanik për vitin e ardhshëm.
Sekretari i Jashtëm britanik, Dominic Raac, e ka cilësuar veprimin si “cungim të papranueshëm të lirisë së shtypit”, i cili “vetëm sa do ta dëmtojë reputacionin e Kinës në sytë e botës”.
Mbikëqyrësi britanik i telekomunikimit “Ofcom” ia kishte revokuar licencën CGTN-së, kanal ky satelitor kinez i lajmeve në gjuhën angleze, më 4 shkurt. Në arsyetimin e vendimit, mbikëqyrësi kishte përmendur si njërën prej arsyeve Partinë Komuniste të Kinës.
Vetëm një ditë pas kësaj, një zëdhënës i Ministrisë së Jashtme kineze ka thënë se “Ofcom” ka vepruar “në baza politike mbështetur në paragjykimin ideologjik” dhe ka shtuar se Kina e rezervon të drejtën për kundërpërgjigje në mbrojtje të të drejtave dhe interesave të mediave kineze.
Humbja e licencës britanike të transmetimit ia shkaktoi një goditje të rëndë CGTN-së. Kanali e ka selinë e saj operacionale për Evropë në Londrën perëndimore dhe është pjesë e iniciativës qeveritare për ta zgjeruar pushtetin e butë të Kinës dhe për ta përmirësuar imazhin e vendit gjetkë.
