Shqiptarja Kosovare Asllani e Suedisë është shpallur edhe një herë futbollistja e ndeshjes në kuadër të Kampionatit Botëror të Futbollit për femra.
Kombëtarja e Suedisë në kategorinë e femrave ka fituar me rezultat bindës 5-1 ndaj Tajlandës në kuadër të Kupës së Botës, raporton Gazeta Express.
Në këtë fitore të Suedisë shënoi edhe futbollistja shqiptare, Kosovare Asllani.
Ajo realizoi për 2-0 në minutën e 19’, derisa golin e parë e shënoi Linda Sembrant.
Golat tjerë për Suedinë i shënuan; Fridolina Rolfo (42’), Lina Hurting (81’) dhe Elin Rubensson (90’+6).
Golin e nderit për Tajlandën e shënoi Kanjana Sungngoen (90’+1).
Kombëtarja e Suedisë është liderë e Grupit F me gjashtë pikë pas dy takimeve, e ndjekur nga SHBA-ja me tri, kurse Kili dhe Tajlanda janë ende pa pikë.
Ky ishte goli i dytë i Kosovare Asllanit në Botërorin e femrave, pasi ka shënuar edhe në fitoren 2-0 të Suedinë kundër Kilit.
Për shkak të paraqitjes fantastike, ajo është shpallur edhe një herë futbollistja e ndeshjes, ashti si në takimin e parë.
Në deklaratën për FIFA-n, Asllani ka thënë se e rëndësishme ishte që Suedia tashmë ka siguruar kualifikimin tutje dhe se mezi pret përballjen me Amerikën në xhiron e tretë të Grupit F.
