Prokurorët federalë gjermanë kanë akuzuar një qytetar gjerman për spiunazh, duke thënë se ai ia ka dhënë inteligjencës ruse planet e ndërtesës së Bundestagut.
Burri i identifikuar si Jens F. arriti t’i siguronte planet e ndërtesës gjatë punës së tij për një kompani që ishte e angazhuar për mirëmbajtjen e pajisjeve elektrike në ndërtesat qeveritare, thuhet në deklaratën e prokurorisë, të publikuar të enjten.
Dyshohet se ky person ia ka dhuruar planet e ndërtesës qeveritare inteligjencës ruse nga fundi i korrikut të vitit 2017 deri në fillim të shtatorit të po atij viti, shkruan Reuters.
Në deklaratën e prokurorisë thuhet se ky person ia ka dërguar një pajisje për ngarkimin e të dhënave një punëtori të Ambasadës së Rusisë, i cili kryesisht ka punuar për agjencinë ruse të inteligjencës, GRU, që merret me inteligjencën e jashtme ushtarake.
Ndryshe, inteligjenca ruse njihet për ndërhyrjet e saj në vendet e huaja. Vitin e kaluar, Çekia dëboi dy diplomatë rusë që u dyshuan si të përfshirë në komplot për helmimin e tre politikanëve të këtij shteti.
Në mars të vitit 2018, dyshohet se agjentët rusë e helmuan në Britani të Madhe ish-oficerin ushtarak dhe agjentin e dyfishtë rus, Sergei Skripal.
