Lulzim Basha gjatë vizitës në Durrës, u ndal në disa prej biznesve në qendër të qytetit ku pa nga afër situatën në të cilën ndodhet sipërmarrja në këtë qytet.
Gjatë bisedës me qytetarët dhe sipërmarrësit, Basha iu bëri thirrje të bëhen bashkë të gjithë me shumicën e shqiptarëve që duan ndryshimin më 25 prill.
Gjithashtu kreu i PD iu shpalosi durrsakëve planin e tij për ekonominë e veçanërisht për biznesin që vendi, siç tha ai, të kthehet në normalitet dhe Shqipëria të ketë një qeveri që mendon për shqiptarët.
Basha ishte edhe në një fasoneri në Sukth, për t’u njohur me situatën që po kalon biznesi i madh.
“Kjo është një situatë katastrofike, ujë s’keni, nga uji përmbyteni! Investime s’ka, kështu që ka ardhur koha të ndryshojmë. Më 25 prill të bëhemi të gjithë bashkë të ndryshojmë. E para e punës t’ju vijmë në ndihmë ju, njerëzve punëtorë të këtij vendi. Edhe njëherë një paketë ndihme të gatshme e cila do të mundësojë të gjitha familjet në nevojë ekonomike të kenë një ndihmë të drejtpërdrejtë dhe do tu mundësoj që edhe punëdhënësit tuaj të kenë mundësinë tu vijnë në ndihmë ju që të keni të sigurt të paktën vendin e punës. Kriza që ka qenë para pandemisë është rënduar edhe më shumë, këtë po flisja me Brikenën. E dyta, paratë e taksave të cilat do të jenë më shumë para në xhepat tuaj për të shpenzuar, por ato para që do t’i paguani si taksa do t’ua kthejmë juve si shërbime”, tha Basha.
