Komisioni për sëmundje infektive duhet ta konsiderojë seriozisht futjen e masave shtrënguese dhe protokolleve shtesë, sepse jemi në një situatë jashtëzakonisht serioze, nga e cila mund të dalim vetëm nëse të gjithë fillojmë të sillemi me përgjegjësi dhe t’i respektojmë masat e mbrojtjes, kumtoi Oda e Mjekëve.
“Duhet ta kuptojmë se secili prej nesh dhe të gjithë ne së bashku, përmes veprimeve tona, mund të ndikojmë ndjeshëm në uljen e numrit të të infektuarve të rinj dhe kështu ta mbrojmë veten, familjet tona, miqtë, kolegët dhe të gjithë qytetarët e tjerë. Me zbatim të vazhdueshëm të masave të mbrojtjes, ne mund ta parandalojmë përhapjen e virusit”, konsideron Oda.
Ata si profesionistë shëndetësorë, pranojnë se këto masa janë jashtëzakonisht jopopullore, por besojnë se në interes të qëndrueshmërisë së kapaciteteve spitalore dhe ruajtjes së shëndetit publik, futja e tyre është më se e nevojshme.
“Vetëm me qasje holistike dhe duke i marrë parasysh të gjithë faktorët dhe me një reagim të shpejtë në të gjitha fushat mund ta luftojmë plotësisht virusin”, theksojnë nga Oda Mjekësore.
Nga Oda Mjekësore u bëjnë thirrje të gjithë qytetarëve ta njohin seriozitetin e situatës në të cilën ndodhemi të shkaktuar nga përhapja e Kovid-19 dhe me kontribut dhe veprim të përbashkët t’ju ndihmojnë mjekëve në luftën për ta mbrojtur shëndetin individual dhe kolektiv, sepse kjo është mënyra e vetme për ta parandaluar përhapjen e mëtejshme të virusit dhe për të shmangur kolapsin e sistemit shëndetësor.
Oda thekson se të dhënat nga Instituti i Shëndetit Publik tregojnë se vala e tretë e virusit po fiton vrull dhe tashmë mbi 1000 pacientë regjistrohen çdo ditë, ndërsa vetëm nga 1 marsi, kur kishte 8.369 raste aktive të regjistruara, deri më sot ky numër është rritur në 12.819 pacientë.
Me angazhimin e kapaciteteve shëndetësore në trajtimin e Kovid-19, theksohet në kumtesën, pasojë e pashmangshme është minimizimi i kapaciteteve për diagnostikimin, mjekim dhe kujdesin e pacientëve me patologji jo-Kovid, gjë që e rrezikon shtesë shëndetin e popullatës.
“Me zbatim të vazhdueshëm dhe të përhershëm të masave për mbrojte, me mbajtje të distancës së sigurt, mbajtje të maskës mbrojtëse, larje më të shpeshtë të duarve dhe shmangie të grupimeve dhe tubimeve, veçanërisht në ambient të mbyllur, mund ta parandalojmë përhapjen e virusit, dhe kështu edhe mjekimin e gjatë dhe të vështirë të komplikimeve, humbje të jetëve dhe shembje të sistemit shëndetësor. Në kushte kur akoma pritet të sigurohen vaksinat për përfshirje më të gjerë të popullatës, vetëm duke i respektuar këto masa të thjeshta mund pandemia të vihet për një kohë të shkurtë nën kontroll”, qëndron në kumtesë.
