Ish presidenti i Shqipërisë Alfred Moisiu kërkon një zgjidhje afatgjatë për ti dhënë fund krizave ciklike në vend.
Duke folur në një tryeze me përfaqësues të medias, shoqërisë civile dhe biznesit, Moisiu tha se për gjetjen e kësaj zgjidhje nevojitet dialog politik ndaj apeloi palët të vendosë interesat e vendit mbi ato të partive.
“Për fat të keq kriza politike po përkeqësohet. Është koha e fundit për dialog mes aktorëve politikë për të gjetur një zgjidhje në interes të Shqipërisë dhe jo në kurriz të saj.
Është koha për një zgjidhje afatgjatë për të mos u kthyer në krizat ciklike. Veprimet e dhunshme ndaj instituticioneve kanë cenuar imazhin e Shqipërisë. Vetëm më vota arrihet demokracia funksionale”, tha Moisiu.
Moisiu shtoi se nxitja e urrejtjes mes shqiptarëve për interesat vetjake të disa drejtuesve politikë është e patolerueshme.
“Është e patolerueshme nxitja e urrejtjes mes shqiptarëve për interesa vetjake apo personale të disa drejtuesve politikë. Përdorimi i shprehjeve nxitëse dhe përçarëse, retorika denigruese ndaj rivalëve nga secila palë politike, mungesa e dialogut mes partive kryesore. Të gjithë këta faktorë kanë çuar në cenim të sigurisë së qytetarëve”, pohoi ish presidenti shqiptar.
