Shefi i Grupit Parlamentar të LDK-së, Arben Gashi duke komentuar ndodhitë e sotme në Kuvend ka thënë se sot ka pasur veprime të dhunshme në kuptimin e dhënies së fjalës në Kuvend.
Ai ka thënë se kryesuesja e seancës së sotme, Saranda Bogujevci është përdorur nga Lëvizja Vetëvendosje.
“Unë kam pritur më shumë se një orë ta marrë fjalën dhe në momentin që e kam marrë më është ndërprerë. Kemi veprime nga kryesuesja e seancës, nuk e di a të qëllimshme por dyshimet shkojnë se kryesuesja e seancës po përdoret nga LVV-ja. Ne sot e patëm të pamundur që të përdorim të vetmin instrument që e kemi të garantuar me Kushtetutë dhe lirinë e fjalës. Unë kam kërkuar mocion procedural… zonja në fjalë nuk ma dha fjalën. Nëse kjo sjellje vazhdon kështu fatkeqësisht kuvendi po shkon drejt tensionimeve. Ne kemi kërkesë që të mbahet mbledhja e kryesisë dhe këto çështje të diskutohen në kryesi të kuvendit. Znj Bogujevci nëse vazhdon me këto sjellje nuk i bën nder as vetit as kuvendit”, ka thënë ai.
Për deklaratën e ministres së Punëve të Jashtme, Donika Gërvalla, ai ka thënë se janë deklarime të tepruara dhe të panevojshme.
“Mendoj se janë deklarime të tepruara dhe të panevojshme. Ato deklarime në atë mënyrë dhe gjuhë në Kuvendin e Kosovës rrallë herë janë dëgjuar, mendoj se Kuvendit i duhet më shumë qetësia, demokracia dhe liria, e jo absolutizmi i shprehur nga foltorja e Kuvendit apo pozita e ministrave apo qeveritarëve. Jemi në një proces ku duhet të jemi të kujdesshëm, e mbi të gjitha duhet të jemi të kujdesshëm për rastet që kanë të bëjnë me krimet e luftës dhe personat që janë arrestuar”, ka deklaruar Gashi.
Ndryshe, deputet e opozitës sot kanë diskutuar me tensione me ministren e Jashtme Donika Gërvallën, e cila gjatë fjalimit të saj në Kuvend i akuzoi deputetët e PDK-së se vetë e kanë krijuar Gjykatën Speciale dhe i kanë dërguar në Hagë ish-bashkëluftëtarët.
