Për herë të dytë brenda tre vjetësh, finalja e Ligës së Kampionëve do të jetë një çështje tërësisht angleze. Fuqia financiare e Premier Leagues dhe mbështetja e pronarëve ekstra të pasur ndihmuan në “pastrimin e rrugës” për në Stamboll, si për Chelsean ashtu edhe për Manchester Cityn. Të dyja ekipet fillimisht u regjistruan për Superligën e shkëputur, së bashku me pjesën tjetër të ekipeve të ashtuquajtura “Gjashtë të Mëdhatë” të Anglisë, para se të tërhiqeshin nga plani i diskutueshëm. Superliga nuk mund të kishte shkuar kurrë përpara pa klubet më të mëdha nga Premier League, por gjigantët e Anglisë kishin më së paku për të fituar.
Elita e futbollit anglez është larg liga më fitimprurëse në Evropë me marrëveshje televizive. Kjo ia lejoi Liverpoolit t’i mblidhte 200 milionë euro në edicionin 2018/19, që ishte i fundit i plotë para pandemisë. Edhe Huddersfield Towni, ekip që bën gara në rangjet e ulëta të Anglisë, i mori mbi 100 milionë euro, më shumë sesa Bayern Muncheni që mori kur e fitoi titullin e kampionit në Bundesligë.
Shpërblime të tilla kanë ndihmuar në stabilizlimin e Premier Leagues si liga më e fortë e futbollit evropian. Për sa i përket dominimit anglez në Evropë, ekipet angleze ishin këtu edhe më përpara.
Në vitin 2019, ndërsa Liverpooli mundi Tottenhamin për ta fituar Ligën e Kampionëve, Chelsea mposhti Arsenalin në finalen e Ligës së Evropës.
Sipas analistëve të kompanisë “Deloitte’s Football Money League”, tri klubet me fitimet më të mëdha në botë edicionin e kaluar ishin Barcelona, Real Madrid dhe Bayerni, me Manchester Unitedin dhe Liverpoolin që qëndronin menjëherë prapa tyre. Sidoqoftë, 12 nga 30 të parët ishin klube të Premier League. Madje, edhe Sheffield Unitedi fitoi më shumë se ekipi nga Serie A, Milani.
Mbështetësit e pasur tërhiqen nga jashtë për t’i blerë klubet më të mëdha të Anglisë. Chelsea dhe City, dy shembujt më të qartë të ndikimit nga pronarët e pasur, do të takohen në finalen e Championsit.
Kjo është finalja e tretë e Chelseat qëkur oligarku rus Roman Abramovich e bleu klubin londinez në vitin 2003. Pas humbjes ndaj Manchester Unitedit në finalen e vitit 2008, e para mes dy klubeve angleze, Chelsea e fitoi trofeun në vitin 2012. Tani Chelsea është kthyer sërish në finale pasi ka shpenzuar rreth 300 milionë euro në përforcime para fillimit të këtij edicioni. Ndërkohë, për Cityn është finalja e parë në Ligën e Kampionëve. Klubi ka ndryshuar tërësisht prej se u ble në vitin 2008 nga Sheiku Mansour i Abu Dhabit.
Finalja e Stambollit do të vijë pothuajse saktësisht 22 vjet pasi City kishte nevojë për penallti për ta mposhtur Gillinghamin në finalen e plejofit të nivelit të tretë anglez. Ka qenë një transformim i jashtëzakonshëm për Cityn. Shpërblimet financiare të Premier Leagues dhe investimi i pronarëve të tyre kanë ndihmuar këto klube, së bashku me Liverpoolin, Tottenhamin, Unitedin e Arsenalin, për të tërhequr shumë nga lojtarët më të mirë në botë por gjithashtu, në mënyrë të rëndësishme, edhe trajnerët më të mirë.
Suksesi i Chelseat dhe Cityt është po aq sukses edhe i trajnerëve, me Pep Guardiolan afër çimentimit të statusit si trajneri më i mirë i brezit të tij dhe Thomas Tuchelin që udhëheq skuadrën nga “Stamford Bridge” në finale të Championsit pak më shumë se tre muaj pasi u emërua në këtë post. Chelsea kishte rezultate të dobëta nën drejtimin e Frank Lampardit, por me ardhjen e Tuchelit londinezët kanë ndryshuar tërësisht. E kanë mbajtur portën e paprekur në 18 prej 24 ndeshjeve nën drejtimin e Tuchelit, i cili sezonin e shkuar u paraqit në finale të Championsit me Paris Saint-Germainin, por u mposht nga Bayerni.
“Këtu kam gjetur një klub kaq të fortë, një klub totalisht të përqendruar në fitore, me një mentalitet shumë të fortë, ku kam pasur kaq shumë mbështetje që nga dita e parë. Premier League është e jashtëzakonshme, sepse nuk e ke shansin të pushosh”, tha Tuchel. “Duhet gjithmonë të jepni 100 për qind nga vetja për të fituar dhe kjo ka një ndikim në mentalitetin e klubit dhe atë të lojtarëve”.
Për dallim nga PSG-ja, kundërshtar që e eliminoi në gjysmëfinale, Manchester City ka shpenzuar para në vetëm disa lojtarë që konsiderohen superyje, pasi ka investuar më shumë në ndërtimin e skuadrës perfekte dhe stafit mbështetës për Guardiolan.
“Ky klub ka të bëjë me të gjithë njerëzit që punojnë në prapaskenë, nuk ka të bëjë vetëm me paratë. Nëse mendoni ndryshe, atëherë të gjithë e keni gabim”, insistoi Guardiola.
Është pothuajse e pamundur që Guardiola të dështojë. Ai është në prag të titullit të tretë të kampionit në Premier League në katër sezone, si dhe titullit në Champions, sukses që i mungon prej vitit 2011 kur ishte trajner i Barcelonës. Në vitin 2019 ishte Jurgen Klopp ai që doli triumfues përballë Mauricio Pochettinos në Madrid. Tani, pasi Bayerni mori trofeun në Gjermani vitin e kaluar, do të jetë ose një spanjoll ose një gjerman që do ta çojë një klub në pronësi të Emirateve ose Rusisë drejt fitores në Ligën e Kampionëve. Por, anglezët do ta marrin me gëzim lavdinë.
“Përballja në finale mes Chelseat dhe Cityt është e mirë dhe e mirëseardhur për futbollin anglez. Kjo është dëshmi se Premier League mbetet liga më e fortë në botë”, insistoi Tuchel.
