Presidenti i Shteteve të Bashkuara Joe Biden u hodh në mbrojtje të hënën ndaj kritikëve që thonë se përfitimet e zgjeruara të papunësisë të parashikuara në projekt-ligjin për masat lehtësuese nga COVID-19 të miratuara në mars po i frenojnë amerikanët të mbushin vendet e reja të punës.
Biden tha se administrata do t’u kujtojë shteteve këtë javë se çdo amerikan i papunë të cilit i ofrohet një punë e përshtatshme duhet ta pranojë atë ose rrezikon të humbasë asistencën e papunësisë.
Ai po udhëzon gjithashtu Departamentin e Punës të punojë me shtetet për të rikthyer detyrimin që ata që marrin përfitime papunësie duhet ta provojnë se po kërkojnë punë në mënyrë aktive.
“Nëse po merrni asistencë papunësie dhe ju ofrohet një punë e përshtatshme, nuk mund ta refuzoni atë punë dhe thjesht të vazhdoni të merrni përfitime të papunësisë”, tha Biden.
Ligjvënësit republikanë fajësuan për shifrat e dobëta të punësimit javën e kaluar vendimin e presidentit demokrat për të ofruar përfitime të zgjeruara të papunësisë deri në gusht.
Disa guvernatorë republikanë kanë anuluar përfitimet e zgjeruara, duke i përdorur fondet shtesë për qëllime të tjera./voa/
