Numri i vdekjeve nga koronavirusi në botë mund të jetë dy apo tre herë më i lartë se shifrat zyrtare të publikuara, ka thënë zyrtarja e Organizatës Botërore të Shëndetësisë, Samira Asma. Sipas saj, ky numër mund te jetë diku mes 6 dhe 8 milionë të vdekur.
“Ky numër mund të jetë dy ose tre herë më i lartë. Unë mendoj se mund të jenë diku 6 deri në 8 milionë të vdekur”, ka thënë ajo, shkruan Reuters.
OBSH-ja thotë se deri në maj të këtij viti kanë vdekur rreth 3 milionë njerëz nga koronavirusi. India është ndër shtetet që javëve të fundit ka regjistruar rritje serioze të rasteve pozitive dhe të të vdekurve.
Ndërkohë, OBSH-ja ka njoftuar të enjten se vaksinat që aktualisht po përdoren kundër koronavirusit, janë efikase në luftimin e të gjitha varianteve të shfaqura deri më tani.
Shefi i OBSH-së për Evropën, Hans Kluge, ka thënë se autoritetet shëndetësore duhet që megjithëkëtë të jenë vigjilente ndaj ngritjes së rasteve me variantin indian, por ka shtuar se vaksinimi dhe masat e izolimit mund të ndihmojnë në parandalimin e përhapjes së variantit indian.
