Kryetari i Partisë Demokratike, Lulzim Basha deklaroi sot nga Dibra se “25 prilli nuk ishte asnjë lidhje me demokracinë”.
Basha tha se “masakra zgjedhore e 25 prillit ishte produkt i një makinerie veprimi i së cilës nisi këtu në Dibër në shtatorin e vitit 2016, u shtri anë e mbanë vendit në qershorin e vitit 2017 dhe mori formën më të egër që ka njohur në 30 vite pluralizëm në masakrën zgjedhore të 25 prillit”.
“Ne e dinim që po futeshim në një betejë të pabarabartë dhe për këtë nuk kishim asnjë fije dyshimi, një një betejë që s’kishte lidhje me rregullat normale të demokracisë. Por fakti është që ne u futëm apo kështu me besimin e madh se mobilizimi i strukturave tona, ose bashkimi rreth vlerave tona do të të frymëzonte një dallgë të ndryshimit të shqiptarëve që do ta mundte regjimin njësoj si në vitin 1991 patëm të njëjtën shpresë”, tha ai.
Basha tha se “ne u futëm në betejë pak a shumë si në 91-shin pa asnjë pushtet përveç pushtetit moral, por vetëm me kauzën e qytetarëve me dëshirën dhe shpresën e tyre për ndryshim për ballë një makinerie shtetërore të bërë njësh me krimin dhe oligarkinë e cila e derdhi lumë paranë e korrupsionit të drogës, të krimit dhe të fondeve buxhetore në të gjitha format dhe mënyrat”.
Basha tha se “kush mendon se me kaq mbaroi e ka shumë gabim, kush mendon se shqiptarët në Dibër apo anembanë Shqipërisë, kanë ndërmend të ngrenë duart dhe të pranojnë këtë masakër, e ka gabim”.
“Zgjidhja që unë propozoj dhe me të cilën dua të vazhdoj t’ju udhëheq, nuk është ajo e kompromisit me të keqen por e betejës deri në fund për të çuar në greminë ata që i çuam buzë greminës me 25 prill”, tha ai.
