Me nisjen e sezonit të plazhit , në vendin tonë u shënuan dhe viktimat e para, si pasojë e mbytjes. Sa të sigurta janë plazhet e bregdetit shqiptar? A ka mjaftueshëm vrojtues bregdetarë dhe sa të pranishëm janë ata në plazhet tona.
Robert Necaj, vrojtues bregdetar në Durrës, thotë për emisionin Ditë e Re, se këtë vit pritet të kemi rreth 1.000 vrojtues në plazhet shqiptare. Një shifër mjaft e lartë në krahasim me vite e kaluar. Megjithatë numri mbetet ende i pamjaftueshëm në krahasim me numrin total të plazheve në vendin tonë, 2.500.
“Këtë vit pritet të kemi rritje të numrit të vrojtuesve gjatë bregdetit shqiptar. Vitin e kaluar ishin rreth 700 vrojtues. Këtë vit pritet të jenë 1000 vrojtues. Bregdeti shqiptar ka 2.500 stacione plazhi. Para katër vitesh nuk kishte vrojtues plazhesh. Në vitin e parë kemi qenë 25 vrojtues. Me kalimin e viteve numri është rritur.“
Ejona Kaltani, instruktore e vrojtuesve për plazhin e Durrësit, thotë se në përpjekje për të rritur sigurinë ne bregdetin tonë, këtë vit janë ngritur struktura të posaçme për të kontrolluar korrektësinë e rojeve bregdetare.
“Ne po e ngremë zërin, që të kemi dhe femra aktive, por akoma nuk është thyer tabuja ashtu siç duhet. Ne na intereson të ketë penalitet vrojtuesi, jo subjekti privat. Duke qenë se në licencojmë djem edhe vajza. Këtë vit do ngrihen struktura, do bëhen kontrolle për të parë se sa prezente dhe aktiv janë rojet bregdetare”, shprehet instruktorja për studion e Rtv Ora.
Ndërkohë Robert Necaj thekson rëndësinë e rojeve bregdetare
“Rëndësia e rojeve bregdetare është shumë e madhe për shumë arsye. E para siguron jetën kur ti futesh në ambient ujor. Ti nuk je i sigurt se çfarë të ndodh nga të papriturat, kur ti futesh në atë terren.”
Megjithatë vërehet se prezenca e vrojtuesve është shumë herë më e ulët në bregdetin jugor. Përparim Kamberaj, vrojtues në Vlorë flet për situatën në brigjet jugore, duke thënë se më Vlorë aktualisht, mbulohen me roje gjysmat e plazheve.
Ai thotë se një ndër problemet kryesore në vendin tonë është se rojet bregdetare janë të padukshëm, nuk identifikohen nga pushuesit, pasi ata nuk mbajnë veshur uniformën identifikuese.
“Në Shqipëri është akoma problem, pasi nuk e konsiderojnë rolin e vrojtuesit. Kjo nuk ndodh vetëm në jug. Ne jemi shumë mbrapa. Është për të ardhur keq, sepse nuk i japin rëndësi jetës së njeriut. Është shumë e rëndësishme të jene të pranishëm.Problemi me ta është se ata dhe kur janë në plazhe, janë të padukshëm, sepse nuk kanë uniforma identifikuese.
Vlora ka 230 plazhe aktualisht. Në Vlorë aktualisht gjysmat e plazheve mbulohen me vrojtues”, shprehet për moderatorët Arjola Shehu dhe Arjon Muça.
