Përzgjedhësi i Kosovës, Bernard Challandes ka thënë se për ta mposhtur Spanjën, Zvicrës i duhen shumë çelësa.
Challandes i është përgjigjur pyetjes se “cili është çelësi për t’i bërë ballë ekipit të Spanjës të premten prej orës 18:00, në kuadër të çerekfinales të Evropianit.
Komentin për ndeshjen që Zvicra e luan ndaj Spanjës, selektori i Kosovës e ka dhënë për “lenouvelliste.ch”, ku është i rregullt në analiza.
“I duhen shumë çelësa”, ka thënë Challandes. “Ne i dimë cilësitë që kanë spanjollët. Kanë zotërimin e topit dhe aftësinë për ta rikuperuar shpejtë humbjen e topit. Spanjollët janë ende shumë të shtrënguar rreth topit. Zvicra mund të zgjedhë mbrojtjen, duke luajtur pak dhe duke i bërë presion. Suedezët patën sukses”, ka thënë Challandes.
Kosova ka luajtur ndaj Spanjës në kuadër të kualifikimeve për Kampionatin Botëror “Katari 2022”. “Dardanët” humbën në udhëtim 3:1 në mars, kurse më 8 shtator e pret në Prishtinë.
