Shkollat janë duke u kërkuar prindërve të mos lejojnë që fëmijët të shikojnë serialin viral “The Squid Game” të NETFLIX pasi kanë frikë se ata mund të përpiqen të kopjojnë skenat e rrezikshme.
Seriali “The Squid Game” i Netflix, është një nga serialet më të pëlyera dhe shikuara deri më sot, por gjithashtu është kthyer edhe në një nga më të diskutueshmit. Sipas The Independent, seriali i zhvilluar në Korenë e Jugut, ku qindra njerëz të mbytur në borxhe konkurrojnë për një çmim në para duke kaluar në një sërë sfidash mbijetese të maskuara si lojëra fëmijësh, është kritikuar nga mësuesit e shkollave të cilët kanë shqetësime se fëmijët po përsërisin disa nga sfidat. Shumë nga episodet përmbajnë skena shumë të dhunshme me konkurrentët të vrarë ose të plagosur rëndë.
Një shkollë në Belgjikë raportoi se fëmijët po imitojnë shfaqjen dhe rrahin fëmijët që humbasin lojërat. Nxënësit në shkollën Beguinage Hainaut të komunës Erquelinnes kanë luajtur lojën “Red Light, Green Light”, e njohur në Belgjikë si 1, 2, 3 Piano.
Kurse shkolla Fillore John Bramston në Ilford u ka dërguar një letër prindërve duke shprehur shqetësimet e saj se fëmijët që kanë parë programin po pretendojnë të qëllojnë njëri-tjetrin në shesh lojërash si një mënyrë për të ri-zbatuar shfaqjen.
“Të dashur prindër,kujdestarë. Na ka ardhur në vëmendje që një numër i fëmijëve tanë po shikojnë lojën Squid në Netflix. Ne kemi vërejtur një numër në rritje të fëmijëve që fillojnë të luajnë versionet e tyre të kësaj loje, që nga ana tjetër po shkakton konflikt brenda grupeve të miqësisë. Fëmijët që po e shikojnë këtë po ekspozohen ndaj skenave grafike realiste të dhunës dhe fatkeqësisht fëmijët po i interpretojnë këto sjellje në shesh lojërash të cilat nuk do të tolerohen. Ky serial nuk është i përshtatshëm për fëmijët e vegjël. Çdo fëmijë që imiton ose demonstron këto sjellje, prindërit do të thirren dhe do të zbatohen sanksionet.Ju lutemi kini parasysh rreziqet e këtij programi televiziv për fëmijët tuaj dhe përforconi sjelljet pozitive. Gjithashtu ju lutemi tregojini fëmijëve tuaj se të qëllosh njëri -tjetrin nuk është e përshtatshme e as e pranueshme. Ju lutemi na mbështetni për t’i mbajtur fëmijët tuaj të sigurt”, thuhet në letër.
Ndërkohë, një shkollë tjetër në Kent, Sandown, ka filluar të ofrojë mësime shtesë mbi dhunën dhe dëmet nga interneti në përgjigje të popullaritetit të programit.
