Ambasadorja franceze në Shqipëri, Elisabeth Barsacq ka dhënë një mesazh të fortë, ndërsa ka dalë kundër qëndrimit të Ambasadores Amerikane Yuri Kim, në lidhje me politikën dhe politik-bërjen në Shqipëri.
Barsacq ka qenë e prerë, kur ka deklaruar, se ambasadorët nuk kanë pse vendosin për Shqipërinë.
Ndryshe nga ambasadorja amerikane, Yuri Kim, e cila iu tha demokratëve që PD, forca e parë anti-komuniste në vend, “të mos hajë bar” për interesat e një njeriu të vetëm, duke iu referuar ish kryeministrit, Sali Berisha, diplomatja franceze, ka zgjedhur të respektojë vullnetin e qytetarëve shqiptarë, qofshin demokratë apo jo, pa ndërhyrë dhe pa dalë me mesazhe që prekin qytetarët.
“Pra janë dy gjëra njëkohësisht: ndërhyrja e të huajve nxitur nga dëshira e një shteti të ri të marrë konfirmimin se po vepron mirë, dhe nga ana tjetër kritika ndaj kësaj ndërhyrjeje. Unë jam tepër e kujdesshme dhe ne nuk kemi pse të vendosim në vend të shqiptarëve”, u shpreh Barsacq, në një intervistë për Euronews Albania.
Sipas saj ambasadorët duhet të shërbejnë shtetin e tyre në vendin ku e përfaqësojnë, dhe të shërbejnë më shumë si këshilltarë, siç e përcakton misioni i tyre.
“Nuk duhet harrur për më tepër se një diplomat, edhe pse mund të flasë mirë gjuhën, të njohë historinë apo të informohet shumë, ai do të jetë përherë në sipërfaqe të realitetit të vendit, edhe pse përpiqeni pareshtur të thellohemi, por nuk i kemi të gjitha çelasat për të kuptuar. Kjo duhet mbajtur përherë para sysh, si dhe natyrisht Konventat e Vjenës”, ka thënë më tej ambasadorja franceze.
Në të njëjtën linjë me ambasadoren franceze ka qenë më herët edhe ambasadori i Bashkimit Europian në Tiranë, Luiggi Soreca, i cili ka thënë se është i prirur të respektojë vendimin e qytetarëve shqiptarë.
Në një deklaratë për mediat, Soreca është pyetur nga gazetarët nëse BE do të bashkëpunonte me Berishën nëse ai vinte në krye të PD-së. Në përgjigjen e tij Soreca tha se BE është gati për bashkëpunim me këdo, në çdo rast.
“Ne kemi bashkëpunuar me këdo dhe kurdo, jemi gati për bashkëpunim me këdo ne çdo rast”, është shprehur ai.
