Agjencia e Sigurisë së Brendshme të Izraelit (Shin Bet) ka arrestuar pesë izraelitë të cilët i akuzon për spiunim për armikun e përbetuar, Iranin, raporton BBC.
Rasti ka përfshirë katër gra hebraike me origjinë nga Irani, që autoritetet izraelite thonë se ishin rekrutuar nga një person që pretendon se është hebraik që jeton në Iran.
Gratë janë paguar me mijëra dollarë për të bërë foto nëpër vende të ndjeshme, të monitorojnë marrëveshjet e sigurisë dhe po ashtu të bëjnë lidhje me politikanët.
Avokati i grave ka thënë se ato nuk e kishin ditur se burri ishte një zyrtar iranian.
Po ashtu ai thotë se gratë nuk e kishin qëllim të dëmtonin sigurinë e Izraelit.
Por Shin Bet ka thënë se çështja është serioze ku ishte planifikuar të krijonin një rrjet të spiunëve iranianë brenda Izraelit dhe se gratë në fjalë po përballen me akuza të rënda.
Iraniani, që e ka quajtur veten Rambod Namdar, pretendohet se kishte kontaktuar me gratë në Facebook dhe kishte mbajtur kontaktin me to për disa vjet nëpërmjet WhatsAppit më pas.
“Ndonëse disa nga gratë dyshonin se burri në fjalë ishte zyrtar i inteligjencës iraniane, prapë ato mbajtën kontaktin me të, u pajtuan të kryenin disa detyra që ai kërkoi dhe morën para nga ai”, thuhet nga Shin Bet.
Sipas Agjencisë, një 40-vjeçare që jeton në Holon, u pajtua të bënte fotografi të ambasadës së SHBA-së kur ishte ende në atë qytet, si dhe ndërtesave të ministrisë, përfshirë asaj të Punës së Brendshme dhe të Mirëqenies Sociale e po ashtu të një qendre tregtare.
Po ashtu i ishte kërkuar gruas që t’i thotë të birit t’i bashkohet inteligjencës ushtarake izraelite gjatë shërbimit të detyrueshëm ushtarak.
Një grua 57-vjeçare nga qyteti Beit Shemesh akuzohet se ka inkurajuar po ashtu të birin që t’i bashkohet inteligjencës ushtarake dhe ka dorëzuar dokumente ushtarake që i takojnë atij.
Gruas iu tha të krijonte një klub të izraelitëve me prejardhje iraniane për të mbledhur të dhënat e tyre persona,e dhe tentoi të bëhej shoqe e ngushtë me një parlamentare të Izraelit, bazuar në akuzat e Shin Bet.
Po ashtu akuzohet se vendosi kamera të fshehura në një dhomë të masazhit në shtëpinë e saj, me synim që të marrë xhirime potencialisht turpëruese të klientëve të saj.
“Këto tentime shkojnë përtej sigurisë dhe inteligjencës; po zgjerohen në tentimet për të influencuar qytetarët e Izraelit dhe shoqërinë izraelite, të minojnë stabilitetin politik në Izrael dhe të dëmtojnë besimin publik në Qeveri”, ka thënë kryeministri i Izraelit, Naftali Bennett.
