Ish-kryeministri i vendit Sali Berisha ka dhënë detaje të tjera lidhur me koalicionin e quajtur “Shtëpia e Lirisë” që do të marrë pjesë në zgjedhjet e pjesshme vendore të 6 marsit.
Berisha tha se PD po firmos marrëveshjen me LSI-në, dhe se ka takuar presidentin Meta, ashtu sikurse me krerët e tjerë të partive opozitare.
Ai shtoi se po zhvillohen takime edhe partitë e tjera të qendrës së djathtë, duke shtuar se negociatat vazhdojnë mes deputetit të PD Flamur Noka dhe nënkryetarit të LSI Petrit Vasili.
“Koalicioni do të jetë ‘Shtëpia e Lirisë’. Unë jam deklaruar se jam për koalicion me LSI. Marrëveshjen po e firmosin Flamur Noka nga ana jonë dhe Sekretari i Përgjithshëm i LSI por do të jenë edhe Demokristianët e Kristian Demokratët. Me LSI-në kemi pasur bisedime në të gjitha nivelet. Edhe unë kam pasur bisedime me zotin Meta. Nuk kemi folur për detaje, por ju e dini që unë kam deklaruar se jam për koalicion me LSI-në. Nuk e kam fshehur këtë. Unë e kam takuar zotin Meta. Kam takuar të gjithë kryetarët e partive opozitare, përveç zotit Dule që ndodhet jashtë vendit. Por edhe me të kam kontaktuar në telefon Vetëm për këto zgjedhje. Partitë e tjera nuk janë regjistruar”, tha Berisha në Çim Peka Live në Syri TV.
