Manchester Unitedi e ka nisur në mënyrën më të keqe rikthimin në fushë pas pushimit dyjavor, duke u eliminuar nga Kupa FA.
Skuadra e drejtuar nga Ralf Rangnick u eliminua nga skuadra e Championshipit, Middlesbrough, pas ekzekutimit të penalltive, pasi koha e rregullt dhe shtesa përfundoi baras 1:1.
Golin e epërsisë e shënuan të parët vendasit përmes Jadon Sancho (25’). Paraprakisht, Ronaldo kishte humbur penalltinë.
Mysafirët barazuan rezultatin përmes Crooks në minutën e 64-të.
Unitedi kishte raste të panumërta për të kaluar në epërsi, por nuk ia doli të shënonte.
Ekzekutimi i penalltive ishte dramë e vërtetë, ku të dyja skuadrat realizuan nga shtatë radhazi, para se Elanga i Manchesterit të dështonte dhe ta godiste topin jashtë portës.
Middlesbroughi e siguroi kalimin në 1/8-n në garën për trofeun më të vjetër anglez.
