Franca ka shtuar thirrjet për një kornizë të re sigurie në Evropë për të zëvendësuar marrëveshjet aktuale “pothuajse të vjetruara ose të parëndësishme” për kontrollin e armëve dhe transparencën në lidhje me lëvizjet e trupave.
Në një intervistë me FT, Ministri i Jashtëm i Francës, Jean-Yves Le Drian, tha se duhej një marrëveshje për të siguruar stabilitet afatgjatë në kontinent, duke shtuar se Vladimir Putin duhej të zgjidhte nëse “do ta bënte Rusinë një fuqi destabilizuese” apo ” partnere në një rend të ri sigurie dhe stabiliteti në Evropë”.
Presidenti francez, Emmanuel Macron, i cili u takua me Putinin javën e kaluar, ka bërë thirrje për një rishikim të sigurisë së Evropës, ndërsa Komisioni Evropian ka premtuar të dalë me propozime.
Në intervistën e FT, Le Drian përcaktoi një qasje trefazore për zbutjen e krizës: tërheqje të verifikuar të forcave ruse nga kufijtë e Ukrainës; rifillim të bisedimeve për marrëveshjet e Minskut për t’i dhënë fund luftimeve në rajonin lindor të Donbasit të Ukrainës; dhe një kuadër të ri evropian të sigurisë.
Ai gjithashtu tha se nuk i besonte pretendimet e Putinit se nuk ishte në dijeni të veprimeve të grupit mercenar rus “Wagner” në Mali.
“Wagner” është punësuar nga junta ushtarake në pushtet dhe është duke i shtyrë trupat franceze që janë dislokuara atje që nga viti 2013 për të luftuar kryengritësit islamikë.
Le Drian tha: “Nuk mund ta kuptoj se si Presidenti Putin mund të mos jetë në dijeni të kësaj situate pasi ata janë ish-ushtarë rusë, të transportuar me avionë rusë dhe duke përdorur armë ruse.
Duke pasur parasysh sasinë e inteligjencës në dispozicion të Presidentit Putin dhe afërsinë e tij me shefin e “Wagner”m duhet të arrihet në përfundimin se ai e di. Ai thotë se nuk e di, por nuk e besoj.
