Kryeministri britanik Boris Johnson mirëpriti bisedën konstruktive midis presidentit rus Vladimir Putin dhe homologut të tij francez, Emmanuel Macron, por përsëriti thirrjen e tij për Moskën që të tërheqë të gjitha trupat nga kufijtë e Rusisë me Ukrainën, transmeton Anadolu Agency (AA).
Në një telefonatë që Johnson zhvilloi me presidentin Macron pas bisedës së tij me Putinin, kryeministri britanik tha se angazhimet ishin një shenjë e mirëpritur për diplomacinë dhe se Rusia ka ende një shans të tërhiqet nga pragu i luftës në Evropë.
“Kryeministri foli me presidentin francez Macron sonte për situatën në Ukrainë. Ata përditësuan njëri-tjetrin për përpjekjet e tyre përkatëse diplomatike, duke përfshirë thirrjen e presidentit Macron me presidentin Putin sot”, thuhet në një deklaratë nga Downing Street.
“Kryeministri vuri në dukje se angazhimet e presidentit Putin ndaj presidentit Macron ishin një shenjë e mirëpritur se ai mund të ishte ende i gatshëm të angazhohej në gjetjen e një zgjidhjeje diplomatike. Kryeministri theksoi se zëri i Ukrainës duhet të jetë qendror në çdo diskutim”, thuhet në deklaratë.
Të dy liderët theksuan gjithashtu rëndësinë e Rusisë dhe Ukrainës në ndjekjen dhe respektimin e Marrëveshjes së Minskut të nënshkruar në vitin 2015 për të ruajtur paqen dhe stabilitetin në Evropë dhe nevojën që Putini të tërheqë të gjitha forcat nga Bjellorusia dhe kufijtë e Rusisë me Ukrainën.
Gjatë vizitës së tij në Gjermani për Konferencën e Sigurisë së Mynihut, kryeministri paralajmëroi se Rusia po planifikonte “luftën më të madhe në Evropë që nga viti 1945” dhe se një pushtim i Ukrainës do të “kishte jehonë në mbarë botën”.
Johnson, megjithatë, shpreson për një zgjidhje diplomatike të krizës në rritje, një ndryshim i qartë në krahasim me aleatin, presidentin e SHBA-së, Joe Biden, i cili ka thënë vazhdimisht se Moska synon të pushtojë Ukrainën.
Tensionet janë rritur në mënyrë dramatike në Ukrainën lindore, ku është regjistruar një numër në rritje i shkeljes së armëpushimit, incidente të shumta të bombardimeve dhe evakuimit të civilëve nga rajonet separatiste pro-ruse të Donetskut dhe Luhanskut.
Vendet perëndimore kanë akuzuar Rusinë për grumbullimin e më shumë se 100.000 trupave pranë Ukrainës, duke shkaktuar frikën se ajo mund të planifikojë një ofensivë ushtarake kundër fqinjit të saj ish-sovjetik.
Moska ka mohuar në mënyrë të përsëritur çdo plan për të pushtuar Ukrainën dhe ka akuzuar vendet perëndimore për rrezikimin e sigurisë së Rusisë përmes zgjerimit të NATO-s drejt kufijve të saj.
