Policia e Shtetit njofton se në kuadër të testit të drogës për efektivët janë ekzaminuar 1736 punonjës, kryesisht nga sektorë dhe mosha me risk. Pas testit, 45 punonjës policie kanë rezultuar të dyshuar pozitivë.
Nga këta efektivë një punonjës policie është përjashtuar nga Policia e Shtetit, duke analizuar edhe rrethanat e tjera të cilat vërtetojnë shkeljen e rëndë disiplinore.
Për efektivët e tjerë që dyshohen pozitivë po kryhen hetime administrative nga Drejtoria e Standardeve Profesionale. Në vijim të hetimit administrativ, për kategorinë e të dyshuarve pozitivë, do të zhvillohet një test i dytë, për t’u siguruar nëse janë përdorues të lëndëve narkotike.
Testi i drogës për punonjësit e policisë së shtetit, nisi në 15 Nëntor të vitit të shkuar. Ky proces është kryer në gjithë drejtoritë vendore, me përzgjedhje rastësore të punonjësve që dyshohen si përdorues të lëndëve narkotike.
