Tash gati një muaj artisti Petrit Halilaj është duke qëndruar në Lyon të Francës. Ai dhe ekipi i tij janë duke realizuar detajet e fundit që kanë mbetur për të prezantuar projektin “Shkrepëtima” para vizitorëve të edicionit të 15-të të Bienales Ndërkombëtare të Artit Bashkëkohor në Lyon.

Edicioni i sivjetshëm do të mbahet prej 18 shtatorit deri më 5 janar, shkruan sot Koha Ditore. 

Instalacioni “Shkrepëtima” rikontekstualizon skenën, kostumet dhe objektet e performancës artistike që është dhënë në Runik në verën e vitit të kaluar. Komplet si projekt, si ekspozitë me dokumentarin e realizuar së fundmi, prezantohet në hapje të edicionit të 15-të të ngjarjes së madhe të artit.

Është pikërisht kjo vepër që është përzgjedhur edhe për atë që njihet si parahapje që do të mbahet më 16 shtator, e ku zakonisht marrin pjesë kritikë, kuratorë, artistë e pjesëtarë të tjerë të njohur të botës së artit.

Elementi kryesor i “Shkrepëtimës” është shtrati i ëndërrimtarit. Mbi shtrat qëndrojnë të varura qindra objekte të cilat artisti i ka mbledhur gjatë pastrimit të Shtëpisë së Kulturës në Runik, para performancës që e ringjalli atë ambient. Ngritja e këtyre objekteve në qiell ua kthen atyre madhështinë që kanë pasur dikur.

Halilaj ka thënë se në Lyon do të prezantohen të gjitha elementet e performancës, si dhe materialet e vërteta të Shtëpisë së Kulturës në Runik, e lënë pas dore që në fund të viteve ’90.