Në mungesë të një lajmi për negociatat, presidenti i Këshillit Europian, Charles Michel solli në Tiranë një ide të re për qasjen e BE-së ndaj Ballkanit Perëndimor, që tha se i ishte kërkuar nga Kryeministri Rama.
“Përpara disa muajsh ne ishim të gjithë bashkë, Kryeministri dhe unë në Suedi, dhe kryeministri më tha që sa e rëndësishme është që të përfshijmë dhe në nivel politik udhëheqësit, të gjithë, në mënyrë që t’i kemi së bashku me 27 udhëheqësit e BE-së dhe unë e ndaj këtë mendim me të. Prandaj kjo është pjesë e asaj që po bëjmë që të zbatojmë pikërisht këtë lloj qasje. Një ide që është shumë pranë e këtij koncepti që ne dëshirojmë të fillojmë sa më shpejt të jetë e mundur, e anëtarëve të asociuar. Kryeministri jo vetëm dha mbështetjen e tij, por pohoi se idenë e kishte dëgjuar nga Presidenti francez Macron”, tha Michel.
“Nëse do të vijë dita që ne të jemi anëtarë të asociuar të Bashkimit Europian, kjo i jep fund të gjitha spekulimeve, i jep fund të gjitha teorive të konspiracionit, i jep fund të gjitha paranojave se ne po na mban Bashkimi Europian aty larg se nuk do të na fusë e se kështu e se ashtu. Kështu që unë mendoj që kjo është një gjë fantastike”, tha Rama.
Në këmbim të përkrahjes që dha për “integrimin e asociuar” të Michel, kryeministri Rama mori nga presidenti i KE mbështetjen për Open Balkan. “Unë personalisht, e mbështes Ballkanin e Hapur dhe uroj që të gjithë të bashkohen me këtë nisëm sepse sa më shumë që të jenë do të jenë aq më të mëdha aftësitë për të bashkëpunuar, për të forcuar strukturat ekonomike, politike. Kjo do ta lehtësojë afrimin e Ballkanit Perëndimor me Bashkimin Evropian”, tha Michel.
“Ballkani i Hapur është një nismë madje me presidentin po diskutonim dhe solli shembullin e Beneluksit. Kështu nisi dhe ai proces. Nisi fillimisht me më pak vende sesa pastaj u përfshinë. Është një nismë e cila synon implementimin, jetësimin e të gjitha parimeve të lirisë së Bashkimit Europian, lirinë e lëvizjes së njerëzve, të mallrave, të kapitaleve të shërbimeve, njësoj si në Bashkimin Europian”, tha Rama.
Ajo që ndan Michel dhe kryeministrin Rama është qasja për trajtimin individual në procesin e integrimit të Shqipërisë dhe Maqedonisë së Veriut, në kushtet e një përgjigje negative për negociatat edhe në qershor.
“Kjo ndarje u urua në drejtimin e anasjelltë lidhur me situatën me dy vendet ….natyrisht është shumë e përligjur që në Shqipëri të ketë padurim lidhur me këtë çështje, për të kaluar këtë pengesë dhe për të filluar këtë negociatë sa më shpejt të jetë e mundur”, tha Michel.
“Ne jemi në të drejtën tonë që të kërkojmë që të dalim nga rrezja e konfliktit që Bullgaria ka hapur me Maqedoninë e Veriut. Do t’i drejtohemi patjetër të gjithëve. Unë e kam bërë të qartë edhe sot e biseduam, e kam bërë të qartë në të gjitha takimet që kam pasur të nivelit më të lartë që ky do të jetë qëndrimi ynë, por deri në fund kur të behet mbledhja e Këshillit Europian”, u shpreh Rama.
Kryeministri përsëriti se kjo qasje do të aktivizohet vetëm në rast se negociatat nuk hapen zyrtarisht as gjatë presidencës franceze të BE-së që përfundon në qershor 2022.
