Të martën e 5 korrikut nisi raundi i dytë i shitjes së biletave për Botërorin e Katarit. I pari përfundoi më 28 prill dhe ata që i rezervuan kishin kohë deri më 17 qershor për t’i bërë efektive.
Faza e dytë e shitjeve filloi përmes faqes së internetit të FIFA-s dhe përfundon më 16 gusht. Çdo aplikant mund të kërkojë maksimumi 6 bileta për ndeshje dhe të blejë një maksimum prej 60 biletash për të gjithë kompeticionin.
Gjatë Kupës së Botës, vetëm tifozët që kanë garantuar biletën dhe akomodimin do të mund të hyjnë në Katar për të shijuar eventin. Autoritetet e Katarit sqarojnë se tifozët që udhëtojnë duhet të aplikojnë për kartën digjitale Hayya. Kjo nuk është gjë tjetër veçse një leje hyrjeje në shtetin e Katarit. Për ta marrë atë, përveç biletave që janë tërhequr, tifozët duhet të konfirmojnë edhe hotelet ku do të qëndrojnë.
Për të kuptuar të gjitha këto, organizata ka vënë në dispozicion faqen www.qatar2022.qa. Tifozët zakonisht kërkojnë dhe bëjnë vetë planet e tyre të akomodimit, por duke pasur parasysh kapacitetin e kufizuar të hoteleve në vend, këshillohet që pasi të merret bileta, të drejtohen në portalin e treguar më sipër për të lehtësuar aksesin. Ai paralajmëron se çmimet “do të evoluojnë sipas ofertës dhe kërkesës”.
Vlerësohet se do të ketë një milion vizitorë gjatë ditëve në të cilat luhet turneu që fillon më 21 nëntor.
