Banorët në qytetin jugperëndimor të Japonisë janë sulmuar nga majmunët që po përpiqen të rrëmbejnë foshnjat, duke kafshuar dhe gërvishtur mishin e tyre dhe të cilet po futen fshehurazi në çerdhe
Banorët në qytetin jugperëndimor të Japonisë janë sulmuar nga majmunët që po përpiqen të rrëmbejnë foshnjat, duke kafshuar dhe gërvishtur mishin e tyre dhe të cilët po futen fshehurazi në çerdhe, transmeton Anadolu Agency (AA).
Që nga 8 korriku, majmunët kanë sulmuar 58 persona dhe sulmet po bëhen aq serioze saqë autoritetet e qytetit Yamaguchi kanë angazhuar një njësi speciale gjahu për këto kafshë, të armatosur me armë qetësuese.
Vendosja e kurtheve ishte e pasuksesshme, sepse këta majmunë nuk janë të interesuar për ushqim.
Viktimat më të zakonshme të majmunëve janë fëmijët dhe të moshuarit.
“Ata janë shumë të zgjuar dhe të aftë për të sulmuar fshehurazi nga pas dhe shpesh kapin njerëzit nga këmbët”, tha të mërkurën zyrtari i qytetit Masato Saito.
Ai paralajmëroi të gjithë se kur përballen me një majmun duhet të shmangin kontaktin me sy, të përpiqen të duken sa më të mëdhenj dhe të përpiqen të largohen me qetësi dhe pa lëvizje të papritura.
Majmunët që terrorizojnë komunitetin janë makakët japonezë, ata shpesh fotografohen duke notuar të qetë në burimet e nxehta.
Deri më tani nuk ka persona me lëndime të rënda ndërsa të gjithë janë këshilluar të marrin mjekim spitalor, kurse në disa raste ka ndërhyrë edhe ambulanca.
Megjithëse, Japonia është e industrializuar dhe urbane, pjesa më e madhe e arkipelagut përbëhet nga male dhe pyje. Njerëzit sulmohen nga arinjtë, derrat e egër dhe kafshët e tjera të egra, por sulmet e majmunëve janë të pazakonshme.
Ende nuk ka informacione se përse po ndodhin sulmet dhe nuk dihet se nga ka ardhur grupi i majmunëve që po sulmojnë njerëzit në Yamaguchi.
“Unë kurrë nuk kam parë diçka të tillë në tërë jetën time”, tha Saito.
