Kryeministri Edi Rama kërkoi sot që të hartohet një hartë e plotë me të dhëna mbi dëmet e shkaktuara nga tërmeti, ndërsa u shpreh se kontakti me njerëzit është me shumë rëndësi në këtë periudhë posttraumatike të tërmetit.
Në një takim me drejtues të Ministrisë së Mbrojtjes, Ministrisë së Brendshme, Emergjencës Civile, Rezervës së Shtetit dhe të gjithë prefektët e vendit, Rama kërkoi që mbi atë hartë të të dhënave që ka prefektura të bëhet një shpërndarje e forcave dhe çdo familje të kontaktohet.
“Strukturat kanë kryer një punë voluminoze në aspektin e identifikimit bashkë me strukturat e pushtetit vendor. Tani duhet të organizohen dhe të shpërndahen në mënyrë të strukturuar me destinacione konkrete për të mos krijuar rrëmujë. Brenda ditës së sotme duhen kontaktuar të gjithë sy më sy. Ky është objektivi”, tha Rama.
Ai tha se “do të angazhohen dhe deputetë dhe ministrat, është një moment psikologjik që kapërcehet me komunikim dhe me praninë e të tjerëve”.
“Prefektë, mbrëmë nuk e di në çfarë ore jam marrë unë me dritat e stadiumit. Kjo nuk është gjëja që duhet të jetë, sepse njerëzit kishin dalë te zona e stadiumit dhe gjëja më e thjesht ishte t’u hapej stadiumi me drita dhe të mos rrinin në gjysmë errësirën e rrugicave. Sot stadiumi duhet të jetë i hapur dhe i pajisur me të gjithë strukturën akomoduese. Kemi afro 700 shtretër në Kovalishencën e Mbrojtjes dhe Ministrinë e Brendshme në dispozicion. Njerëzit mund të shkojnë atje, si pika e parë nga ku mund të merren dhe çohen në Kovalishencë në rast se ka akoma stres”, tha Rama.
Kryeministri tha se “tërmetin nuk e parashikon dot askush”. “Nuk ka shpikur akoma njerëzimi parashikimin e tërmeteve, por kjo nuk do të thotë se ajo që ndodhi do të vazhdojë, por tërmeti është në psikologjinë e njerëzve akoma. Duhet t’i ofrojmë gjithçka, stadiumin dhe autobusë dhe mjete të tjera nëse kanë rast problemi psikologjik”, tha Rama.