Sot ka ndërruar jetë ish-kandidatja për kryetare të Skënderajt, Ajnishahe Halimi.
Vet Halimi më 30 gusht të këtij viti kishte bërë një postim në Facebook, ku kishte treguar se prej një kohe gjendja e saj shëndetësore ishte jo stabile
“Ka nje kohe qe gjendja ime shendetesore eshte jo stabile, ky eshte fakti qe nuk kam qene prane jush! Pavaresisht kesaj gjendje une nuk dorezohem as me vullnet as me guxim…Por do t’ju mungoj edhe nje kohe se tash mora forcen dhe besimi tek vetja qe te filloj nje trajtim tjeter. Ju uroj gjithe te mirat”, kishte shkruar ajo.
Në fillim të këtij viti, në një intervistë për televizionin publik Halimi kishte rrëfyer se si e kishte kaluar sëmundjen e kancerit të gjirit.
Aty, ajo u kishte dhënë forcë edhe të prekurve të tjerë nga kjo sëmundje që me vullnet ta tejkalojnë këtë sfidë.
“Është një forcë e brendshme që të shtyen me pasë një vullnet, sepse jeta është lëvizje, jeta është sfidë dhe ne jemi njerëz, kemi emocione dhe pavarësisht emocioneve, ne sfidat duhet t’i tejkalojmë çfarëdo qofshin ato”, kishte thënë Halimi.
Por, kush është aktivistja Ajnishahe Halimi ?
Ajnishahe Halimi ka lindur më 8 nëntor të vitit 1961.
Ajo ka qenë dëshmitare e dorës së parë e një prej sulmeve të para ndaj familjes Jashari, më 22 janar të vitit 1998.
Pas luftës, Halimi për një kohë ka qenë edhe cicerone e kompleksit të Jasharëve në Prekaz.
Një prej arritjeve të saj më të mëdha në politikë, ishte kur u kandidua për kryetare të Skënderajt me Lëvizjen Vetëvendosje.
Megjithatë, ajo nuk ia kishte dalë ta fitonte këtë garë.
Halimi ishte larguar nga Vetëvendosje, duke e formuar organizatën e saj politike të quajtur Fraksion+ dhe vite më vonë iu bashkua Partisë Demokratike të Kosovës.
Deri në fund të muajit gusht, kur njoftoi se po vuante nga sëmundja, Halimi ishte aktive në aktivitetet e PDK-së.
Varrimi i saj do të bëhet në ora 17:00, në fshatin Gurelez (Kozhicë).
