Raportimet për vdekjen e dy shefave ekzekutivë të kriptomonedhave brenda një jave kanë nxitur një mori pretendimesh.
Lidhjet e supozuara janë midis vdekjes së tyre dhe multimilionerëve të tjerë nga industria.
Tiantian Kullander dhe Vyacheslav Taran kishin pasuri të vlerësuara në miliarda dollarë.
Ata tani janë në qendër të narrativave të reja konspirative në mediat sociale, pavarësisht nga provat e kufizuara.
E gjitha vjen një muaj pasi zhvilluesi i kriptomonedhave, 29-vjeçari Nikolai Mushegian, u mbyt në Puerto Rico.
Paqëndrueshmëria e kriptos, skandalet e ndryshme dhe dobia e mbrojtur si një alternativë e decentralizuar ndaj sistemeve tradicionale bankare, ka nxitur teorizime konspirative.
Këtë, edhe kur provat mungojnë ose nuk ekzistojnë.
“Newsweek” ka eksploruar historinë e ndërtimit të ngjarjeve të fundit.
Ndër vdekjet më të hershme që ka nxitur spekulime në disa qarqe të teorive të konspiracionit është ajo e 28-vjeçares Autumn Radtke, e cila vdiq në vitin 2014.
Shefe e First Meta Pte Ltd, Radtke vdiq në Singapore, me një gjykatë të atjeshme që e përcaktoi vdekjen e saj si vetëvrasje.
Madje, ajo kishte kërkuar metoda të vetëvrasjes para vdekjes së saj dhe u kishte besuar miqve dhe kolegëve për stresin e saj.
Pavarësisht gjetjeve mjekësore, duket se Radtke është lidhur me vdekjet e fundit, edhe pse ajo vdiq më shumë se tetë vjet më parë.
Një tjetër vdekje e diskutueshme ka qenë ajo e Gerald Cotten, themeluesit të Quadriga CX, dikur shkëmbimi më i madh i kriptomonedhave në Kanada.
Ai ndërroi jetë gjatë muajit të mjaltit me gruan e tij, Jennifer Robertson, në Jaipur, Indi, në vitin 2018.
Sipas një hetimi, 30-vjeçari vdiq nga komplikimet që lidhen me sëmundjen e Crohn dhe Robertson u kthye në Kanada me trupin e tij.
Çmimi i Bitcoin-it kishte filluar të binte para vdekjes së tij dhe kompania e tij ishte në rrugën e duhur për të humbur miliona dollarë.
Asokohe, ai kishte një vlerë neto prej mbi 200 milionë dollarë dhe fjalëkalimet në llogaritë e Quadriga.
Por pas një hetimi nga Komisioni i Letrave me Vlerë të Ontarios, u zbulua se Cotten kishte krijuar “llogari të rreme Quadriga, kishte përdorur fonde të rreme dhe kishte bërë tregti reale, duke vënë baste mbi vlerën e kriptomonedhës”.
Kurse një tjetër hetim zbuloi se fondet iu transferuan personalisht Cotten dhe palëve të tjera.
Megjithatë, disa besojnë se ai është ende gjallë nxitur nga shkrimi i gabuar i emrit të tij në certifikatën e vdekjes dhe se ai e kishte përgatitur testamentin e tij vetëm disa ditë para muajit të mjaltit.
Ka pasur edhe thirrje që varri i Cotten të zhvarrosej për të kryer një autopsi “për të konfirmuar identitetin e tij dhe shkakun e vdekjes”.
Po në të njëjtin vit, Matthew Mellon, një miliarder kripto, vdiq papritur.
Thuhet se kishte probleme me drogën. Pasuria e tij neto u raportua të ishte rreth një miliard dollarë.
Paçka dyshimeve se ai mund të jetë vrarë, pretendimet mbeten të paprovuara.
Tre vjet më vonë, në vitin 2021, investitori rumun i Bitcoin-it, Mircea Popescu, vdiq, duke lënë një pasuri që mendohet se vlen më shumë se dy miliardë dollarë.
Shifra duket se bazohet në zotërimet e tij të vlerësuara prej 30 mijë Bitcoin në atë që ishte kulmi i kriptomonedhës para vdekjes së tij.
Dyshohet se ai është mbytur në brigjet e Kosta Rikës, me raportime se ishte përfshirë nga rryma.
Emri i Popescu-t është qarkulluar në bisedat rreth vdekjeve më të fundit të miliarderëve të kriptomonedhave, me disa që vënë në dukje ngjashmërinë midis mbytjes së tij dhe Nikolai Mushegian.
Megjithatë, ka pasur arsye të konsiderueshme për të besuar se vdekja e tij ishte vërtet aksidentale.
I pari midis grupit të sipërmarrësve të shquar të kriptove që vdiqën këtë vit ishte Nikolai Mushegian.
Ai ishte zhvilluesi i hershëm i MakerDAO, i përshkruar si “protokolli më i madh i financave të decentralizuara”, një lloj teknologjie financiare e krijuar për të hequr palët e treta dhe institucionet e centralizuara nga transaksionet monetare.
Departamenti i Policisë së Puerto Rico-s ka njoftuar se Mushegian ishte ‘rrëmbyer nga rrymat detare” në plazhin Condado në San Juan.
Po ashtu u raportua se “personeli i shpëtimit arriti të shpëtojë trupin e tij që nuk tregonte më shenja jete”.
Më herët atë ditë, Mushegian publikoi një mesazh paranojak që pretendonte kërcënime për jetën e tij në llogarinë e tij në Twitter.
“CIA dhe Mossad po drejtojnë një lloj rrjete shantazhi të trafikimit seksual jashtë Puerto Rico-s dhe ishujve të Karaibeve… Ata do të më torturojnë deri në vdekje”.
Por hetimi nuk gjeti prova që e vërtetonin këtë.
Sidoqoftë, vdekja e tij shkaktoi tweet-e të tjera nga komuniteti i kriptove që shprehin dyshimin për një lojë të pistë.
Po ashtu Tiantian Kullander, një bashkëthemelues i kompanisë së aseteve digjitale Amber Group, vdiq në gjumë më 23 nëntor 2022.
Megjithatë, vdekja e tij po trajtohet nga teoricienët e konspiracionit si e dyshimtë, me pretendimet se e kanë vrarë.
Por këto pretendime janë paraqitur pa prova.
Pse kanë zënë rrënjë këto teori?
Llogaritë që lidhin së bashku vdekjen e këtyre investitorëve dhe figurave të pasura të kriptove duket se janë një përpjekje oportuniste për të gdhendur një narrativë të bazuar në pak më shumë se dyshime.
Ndryshe, po kërkojnë të krijojnë një bazë për lulëzimin e teorive konspirative.
Komunitetet e kriptomonedhave kanë gjetur shpesh lidhje në kauza dhe filozofi anti-establishment, skeptikë ndaj sistemeve tradicionale bankare, duke kërkuar të krijojnë alternativa ndaj institucioneve monetare të centralizuara dhe rrugëve financiare.
Nga ana tjetër, lindja e kriptomonedhës ka nxitur dyshimin midis politikanëve dhe figurave institucionale, të etur për të shtrënguar rregulloren në një treg që festonte libertarianizmin e tij.
Mosbesimi i ndërsjellë midis drejtuesve të institucioneve dhe atyre që mbështesin meritat e kriptomonedhës nxit një mjedis në dukje ideal për lulëzimin e narrativave spekulative dhe konspirative. /Albanianpost.com
