Barrikada e para që u hoq mëngjesin e kësaj të enjteje në Kosovë, ishte ajo në Merdare. Barrikada në fjalë ndodhej në anën serbe dhe ishte vendosur aty prej mesnatës të së mërkurës. Gazetarja Blerta Dalloshi Berisha, thotë se me heqjen e saj është rikthyer qarkullimi normal në këtë pikë kufitare.
“Për barrikadën që po flasim, që është hequr, bëhet fjalë për barrikadën që ndodhet në territorin e Serbisë, që është në rrugën që lidhet me kufirin me Merdaren, do të thotë nga pjesa e Podujevës dhe jo për veriun e Kosovës. Barrikada atje është hequr ndërsa policia e Kosovës ka konfirmuar që është vënë në qarkullim pika kufitare për në Merdare, rrugën që lidh Kosovën me Serbinë afër Podujevës.”
Megjithatë, gazetarja thotë se barrikadat e tjera të vendosura në veri të Kosovës prej 20 ditësh tashmë nuk janë hequr ende.
“Ndërsa këtu në veriun e Kosovës ende nuk ka nisur heqja e barrikadave. Që prej mëngjesit jemi këtu. Barrikada që është tek vendi i quajtur Kërshi Dudës, që lidh veriun e Mitrovicës dhe rrugën që të çon në pikën kufitare në Jarinje janë djegur dy kamionë gjatë natës. Ndërsa nuk dihet saktë përse ende nuk ka nisur heqja e barrikadave në veri, në një kohë kur Vuçiç kishte bërë thirrje dhe kishte paralajmëruar që heqja e barrikadave do të niste që prej mëngjesit. Ende nuk ka asgjë konkrete. Ne ishim edhe në Rudarë dhe kaluam andej barrikadave. Protestuesit gjendeshin ende aty, në qendrën e Rudarës, apo tek Kryqi siç e quajnë serbët lokalë”.
Sa i përket kamionëve të djegur, gazetarja thotë se ka aludime të ndryshme.
“Dikush thotë që janë djegur nga disa rusë që ndodhen këtu, por ka edhe të tjerë që thonë që ka protestues që po e kundërshtojnë presidentin e Serbisë Vuçiç, duke thënë që nuk kanë qëndruar në barrikada për ta lëshuar një ish-polic serb dhe pastaj për t’u dorëhequr. E konsiderojnë si dorëheqje. Po ajo që aludohet më shumë, e që duket të jetë më e sigurta, këto bëhen me qëllim si lojë, në mënyrë që presidenti i Serbisë Aleksandër Vuçiç të dalë pastër para ndërkombëtarëve, duke thënë që nuk është ai që i ka futur në barrikada dhe nuk e ka të lehtë edhe t’i heq barrikaduesit, duke arsyetuar se ata kanë pakënaqësi dhe për këtë arsye kanë ndodhur të gjitha këto. Ka spekulime të ndryshme, në një kohë që nuk kemi asgjë zyrtare”./tvklan.al
