Administrata talibane ka denoncuar Princin Harry të Britanisë për pranimin e tij për vrasjen e 25 personave gjatë detyrës ushtarake në Afganistan dhe një zyrtar i lartë afgan ka akuzuar mbretërinë për vrasjen e civilëve të pafajshëm.
“Ne kontrolluam dhe zbuluam se ditët në të cilat Princi Harry po përmend vrasjen e 25 muxhahedinëve, ne nuk patëm viktima në Helmand”, tha udhëheqësi tileban Anas Haqqani për Al Jazeera të premten. “Është e qartë se civilët dhe njerëzit e zakonshëm ishin në shënjestër”.
“Kjo histori është pjesë e shumë krimeve të luftës të 20 vjetëve të pranisë ushtarake perëndimore në Afganistan”, tha ai. “Nuk është e gjithë tabloja e krimeve të kryera prej tyre”.
Udhëheqësi i talibanëve akuzoi më parë mbretërinë britanike për kryerjen e “krimeve të luftës”.
“Zoti Harry! Ata që vratë nuk ishin lojtarë shahu, ata ishin njerëz”, shkroi Haqqani në Twitter, duke iu referuar përshkrimit të Princit Harry se eliminimi i njerëzve për të cilët ai tha se ishin “luftëtarë të armikut” ishte si të hiqni “pjesët e shahut” nga një tabelë.
“E vërteta është ajo që keni thënë; Njerëzit tanë të pafajshëm ishin shahu për ushtarët, udhëheqësit tuaj ushtarakë dhe politikë. Megjithatë, ju u mundët në atë ‘lojë’”.
Talibanët u rikthyen në pushtet në gusht 2021 pasi trupat e NATO-s të udhëhequra nga ShBA-ja u tërhoqën pas 20 vjetësh pushtim ushtarak të Afganistanit. Dhjetëra mijëra afganë, një numër i madh i tyre civilë, u vranë dhe u plagosën gjatë luftës. Vendi ende nuk ka dalë nga efektet e luftës.
Forcat e udhëhequra nga ShBA-ja si dhe talibanët janë akuzuar për krime lufte gjatë dy dekadave të luftës.
Në kujtimet e tij që do të publikohen javën e ardhshme, Harry zbulon numrin e njerëzve që vrau gjatë dy turneve të detyrës, kanë raportuar mediat britanike.
“Numri im është 25. Nuk është një numër që më mbush me kënaqësi, por as nuk më vë në siklet”, shkroi ai në librin “Spare”, që do të dalë të martën. “Kur e gjeta veten të zhytur në vapën dhe konfuzionin e luftimeve, nuk i mendoja ata 25 si njerëz. Ishin copa shahu të hequra nga tabela. Njerëzit e këqij eliminoheshin para se të vrisnin njerëz të mirë”.
Duka i Sussex-it shërbeu në Afganistan fillimisht si një kontrollues ajror në sulmet ajrore nga viti 2007 deri në 2008, më pas duke fluturuar me helikopterë sulmues Apache në vitin 2012 dhe 2013. Ai shërbeu 10 vjet në ushtrinë britanike, duke u ngritur në gradën e kapitenit.
