Shefi për Politikë të Jashtme dhe të Sigurisë së Bashkimit Evropian, Josep Borrell, pas përfundimit të takimeve veç e veç me kryeministrin Albin Kurti dhe presidentin serb Aleksandër Vuçiç, ka nisur takimin e përbashkët me të dy liderët nën shoqërimin e emisarit të posaçëm të BE-së për dialogun, Miroslav Lajçak.
Ky takim pritet të përfundojë rreth orës 18:00 e pastaj palët pritet të dalin me një deklaratë të përbashkët e me garanci verbale se është arritur pajtim i përbashkët për nënshkrimin e “Marrëveshjes Bazë” të mbështetur në propozimin evropian për normalizimin e marrëdhënieve.
Megjithatë, nëse kjo nuk ndodhë, publikut të gjerë do t’i drejtohet vetëm kryediplomati Borrell përmes një konference për media menjëherë pas takimit, gjë që nënkupton se priten të jenë negociata të shpejta. Por, siç ka mësuar Albanian Post, ky takim mund të zgjasë deri në orën 21:00.
Në Bruksel ndodhet edhe i dërguari i posaçëm i Shteteve të Bashkuara të Amerikës për Ballkanin Perëndimor, Gabriel Escobar, i cili fillimisht ka takuar presidentin e Serbisë, për të vazhduar më pas sipas agjendës.
Ndonëse propozimi franko-gjerman që ‘trazoi’ skenën politike në Prishtinë dhe në Beograd u është dorëzuar dy liderëve në fund të verës së vitit të kaluar, fillimisht si “plan fillestar”, pastaj si dokument i modelit “merre ose lëre”, përmbajtja e tij nuk është bërë akoma publike.
Ky propozim, të cilin e pati publikuar ekskluzivisht Albanian Post, parasheh të drejta të barabarta për Kosovën dhe Serbinë, respektim të integritetit territorial, paprekshmëri të kufijve, njohje të simboleve shtetërore dhe garanci shtesë për komunitetin serb në Kosovë.
Është bërë e qartë gjithashtu që në këtë fazë propozimi evropian nuk është më i negociueshëm. Pra, palët kanë vetëm dy mundësi – pranim ose refuzim. Pranimi nënkupton shpërblime, ndërkaq refuzimi nënkupton penalizime edhe sanksione personale ndaj Kurtit dhe Vuçiç-it.
Kryeministri Kurti vazhdimisht ka deklaruar se Asociacioni i Komunave me shumicë serbe, si një mekanizëm një-etnik, do ta gjymtonte funksionalitetin e Kosovës multi-etnike, duke trumbetuar kështu “minishtetin” serb në Kosovë.
Ndërsa plani i propozuar franko-gjerman, që gëzon edhe mbështetjen e Shteteve të Bashkuara, nuk e përfshin njohjen reciproke e as anëtarësimin e Kosovës në Organizatën e Kombeve të Bashkuara, sikur ngulmonte vazhdimisht Kurti.
Presidenti Vuçiç nga ana tjetër, që ende nuk ka sanksionuar Rusinë aleate për agresionin në Ukrainë, po e përdor ende politikën e jashtme “edhe me Rusinë, edhe me Perëndimin” për të fuqizuar kushtet e tij, duke përdorur edhe tërheqjen e serbëve nga të gjitha institucionet politike, juridike dhe të sigurisë në veri të Kosovës.
