Procesi për ratifikimin e marrëveshjes së divorcit mes Londrës dhe Bashkimit Europian vazhdoi edhe sot në krahun europian pavarësisht kërkesës së Britanisë së Madhe për një shtyrje tjetër të Brexit, mbi të cilën presidenti i Këshillit Europian, Donald Tusk do të konsultohet me 27 vendet e BE-së.
“Kjo kërkesë, pasojë e një votimi të papritur në Dhomën e Komuneve, do të bëhet objekt i bisedimeve disaditore mes Donald Tuskt dhe drejtuesve të 27 vendeve të BE-së”, sipas një burimi europian.
“Ajo u shqyrtua shpejt, por nuk u debatua sot në mëngjes gjatë një takimi të shkurtër në Bruksel të ambasadorëve të 27 vendeve me negociatorin europian për Brexit, Michel Barnier”, theksoi një prej pjesëmarrësve në takim.
Gjatë takimit, që zgjati 15 minuta dhe ishte teknik sipas pjesëmarrësve, ambasadorët kanë folur kryesisht për vazhdimin e procesit të ratifikimit të marrëveshjes së Brexit, arritur këtë javë mes Londrës dhe Brukselit.
“Ashtu si ishte parashikuar, ambasadorët europianë janë mbledhur sot për të vendosur për etapat e ardhshme të ratifikimit nga BE të marrëveshjes për Brexit të njoftuar të enjten”, deklaroi Barnier për gazetarët në përfundim të takimit./