Produksioni i BBV mesa duket ka vendosur ta shfrytëzojë deri në fund personazhin e famshëm të këtij edicioni, Luiz Ejllin. Për të mbajtur të mbërthyer shqiptarët edhe natën e fundit të spektaklit, kanë vendosur t’iu bëjnë edhe një dasmë tjetër, si dhe një celebrim, që me siguri do të bëhet nga kryebashkiaku.
Të martën në “Fan Club”, nusja e kësaj dasme, Kiara Tito, zbuloi më shumë detaje .“Do të ndodhë një celebrim në natën finale, jam shumë e emocionuar”.
Ajo ka thënë se tezen do ta ketë dëshmitaren e saj, pasi është njeriu më i dashur në botë.
“Do ia lëmë pak magjinë asaj nate. Nuk do t’i themi të gjitha. Dëshmitare do të kem tezen time që është njeriu më i rëndësishëm. E kam motër, e kam familje, e kam gjithçka”. Nuk dihet se kush do të jetë dëshmitari i dhëndrit.
Por, a e ka gjetur fustanin e bardhë për natën e paharrueshme
“Kam provuar disa fustane. Kam thënë që dua një fustan të gjatë, por kam ndryshuar mendim. Ndoshta do të vij me diçka krejt tjetër”, përgjigjet moderatorja në “Fan Club”, që zbulon edhe takimin që ka pasur këto ditë me nënën e të dashurit të saj.
“E kam takuar. Është një zonjë shumë fisnike, shumë e mirë, ma hoqi pak mallin e Luizit. Nuk gënjente kur thoshte që jemi i njëjti tip”.
Luizi ishte konkurrenti që shprehu pëlqimin për Kiarën që në ditët e para të qëndrimit në shtëpi. Me përkushtimin e tij, arriti të bënte për vete moderatoren. Një dasmë e organizuar si lojë në shtëpi përfundoi në një celebrim të vërtetë, kur çifti shkëmbeu puthjen e parë në buzë. Surprizat për Kiarën kanë qenë të shpeshta. Para se ajo të eliminohej, mori propozimin për martesë nga këngëtari.
