Bashkia e Himarës e cila së fundmi është shndërruar në qendrën e debatit politik për shkak të arrestimit të kandidatit të koalicionit “Bashkë Fitojmë”, Fredi Beleri, ka parë sot një dyndje të madhe të votuesve në qendrat e votimit.
Nga vëzhgimi në terren i gazetares së RTSH-së, Denada Shkodrani konstatohet një numër i lartë i votuesve që presin në radhë, kryesisht të moshuar.
Ndërkaq, komisionerët e qendrës së votimit nuk tregohen të gatshëm për të dhënë detaje mbi numrin e pjesëmarrësve teksa pyeten nga gazetarja Shkodrani, por mjaftohen vetëm duke theksuar se “nuk ka pasur asnjë problem dhe nuk është dashur ndërhyrja e policisë. Ka një numër shumë të madh. Procesi vijon rregullisht”
Nga ana e tyre, qytetarët teksa presin në radhë shprehen gjithashtu se nuk kanë pasur probleme me procesin e votimit.
Ndërkaq, kreu i PBDNJ-së, Vangjel Dule ka deklaruar se kandidati i majtë Jorgo Goro po u ushtron presion qytetarëve duke u dhënë para në këmbim të votës.
“Nga vizitat personale në disa qendra votimi në distancë siç e parashikon ligji dhe nga informacionet që kemi nga përfaqësuesit e koalicionit bashkë fitojmë, dua të denoncoj aktivizimin e të afërmve të kandidatit të PS duke ushtruar presion, duke ofruar para në këmbim të marrjes së kartave të identitetit dhe duke ushtruar presion mbi zgjedhësit para qendrave të votimit. Tentojmë të komunikojmë me policinë pa sukses. Në shumicën e qendrave që kam vizituar nuk ka prani policore, është detyrim ligjor të jenë. Është detyrë e policisë të respektojë ligjin”, tha Dule.
