Kryeministri Edi Rama e ka cilësuar vendimtar rolin e presidentit të Turqisë, Erdogan për zgjatjen me 2 muaj të marrëveshjes së grurit për të siguruar furnizimin e pandërprerë me drithëra në tregjet botërore, pavarëisht luftës me Ukrainës dhe Rusisë.
“Mirëpres rinovimin e Iniciativës së zgjatjes së marrëveshjes së grurit të Detit të Zi edhe për dy muaj të tjerë. Përsëris urimet e mia për rolin e tij (Erdoganit) vendimtar. Sigurimi i një furnizimi të pandërprerë jetik me drithëra në tregjet botërore është me rëndësi kritike për sigurimin e sigurisë ushqimore në mbarë botën”, shkruan Edi Rama në Twitter.
Presidenti turk Tajip Erdogan njoftoi zgjatjen e marrëveshjes në një fjalim televiziv dhe më vonë u konfirmua nga Rusia, Ukraina dhe Kombet e Bashkuara.
Fluksi i anijeve përmes korridorit ishte ndaluar në ditët e fundit me marrëveshjen që do të skadonte ditën e sotme
“Vijimi i marrëveshjes është një lajm i mirë për botën” u shpreh Sekretari i Përgjithshëm I OKB-së, Guterres.
Kombet e Bashkuara dhe Turqia ndërmjetësuan marrëveshjen e Detit të Zi për 120 ditët e para në korrik të vitit të kaluar për të ndihmuar në trajtimin e krizës globale të ushqimit që është përkeqësuar nga pushtimi rus i Ukrainës, një nga eksportuesit kryesorë në botë të drithërave.
Moska fillimisht refuzoi për të zgjatur paktin nëse nuk plotësohej një listë e kërkesave në lidhje me eksportet e saj bujqësore.
“Ky është një shans për të ndihmuar në sigurimin e sigurisë globale të ushqimit, jo me fjalë, por me vepra. Para së gjithash, për të ndihmuar vendet më në nevojë. Vlerësimi ynë parimor për marrëveshjet e Stambollit të 22 korrikut 2022 nuk ka ndryshuar dhe shtrembërimet në zbatimin e tyre duhet të korrigjohen sa më shpejt që të jetë e mundur”, bëri të ditur Ministria e Jashtme ruse, duke konfirmuar zgjatjen e marrëveshjes.
Ndërsa eksportet ruse të ushqimit dhe plehrave nuk i nënshtrohen sanksioneve perëndimore të vendosura pas pushtimit të Ukrainës në shkurt të vitit 2022, Moska thotë se kufizimet mbi pagesat, logjistikën dhe sigurimet janë bërë pengesë për dërgesat, transmeton Reuters.
Ambasadori i Rusisë në OKB, Vassily Nebenzia, tha se marrëveshja u zgjat sepse “ne ende nuk e humbim shpresën se problemet që po ngremë do të zgjidhen.
Nga ana e tij, shefi i OKB-së Guterres tha se mbeten ende çështje të pazgjidhura. Por pavarësisht kësaj, sipas tij, përfaqësuesit e Rusisë, Ukrainës, Turqisë dhe Kombeve të Bashkuara duhet t’i vazhdojnë t’i diskutojnë ato.
“Duke parë përpara, ne shpresojmë që eksportet e ushqimit dhe plehrave, përfshirë amoniakun, nga Federata Ruse dhe Ukraina do të jenë në gjendje të arrijnë zinxhirët e furnizimit global në mënyrë të sigurtë dhe të parashikueshme”, tha Guterres.
