Krerët e shteteve të BE-së dhe Ballkanit Perëndimor kanë marrë sot pjesë në punimet e forumit “Open Roads Balkans Back in Business”, ku pavarësisht agjendës tema më e nxehtë e diskutimeve ka qenë situata e tensionuar në Veri të Kosovës.
Askush prej liderëve nuk ka mundur t’i shpëtojë insistimit të mediave për një koment mbi përplasjen e protestuesve serbë me trupat e KFOR-it dhe dhunën ndaj mediave, ndërsa mesazhi që ka prevaluar ka qenë për bisedime dhe stabilitet.
Edhe kryeministri Edi Rama ndodhet në Bratislavë, ku nuk kanë munguar takimet dypalëshe me liderët e BE-së.
Në mesditë, shefi i qeverisë është takuar me Presidentin francez, Emannuel Macron, duke u ndalur në diskutime mbi projektet e përbashkëta mes dy vendeve, por edhe sfida madhore si lufta në Ukrainë dhe tensionet midis Kosovës e Serbisë.
Bratislavë, Sllovaki – Me Presidentin e Republikës së Francës, Emmanuel Macron, në një takim shumë miqësor, ku u prekën me thellësi temat e rajonit tonë në sfondin e konfliktit në Ukrainë, marrëdhënia e Ballkanit Perëndimor me BE-në dhe nevoja për një qasje të re politiko-ekonomike, si edhe marrëdhëniet bilaterale Francë-Shqipëri.
Edi Rama në Facebook
