Gjirokastra po bën përgatitjet e fundit për të pritur mbi 1200 artistë e mijëra vizitorë në kalanë e Argjirosë. Festivali Folklorik do të nisë më datë 24 qershor-1 korrik i cili do të transmetohet drejtëpërdrejtë në RTSH.
Në të marrin pjesë të gjitha grupet folklorike shqiptare si dhe grupe nga shqiptarët e Kosovës, Malit të Zi, Maqedonisë, si dhe nga arbëreshët e Italisë dhe grupe folklorike nga vende të ndryshme si dhe të ftuar për të ndërthurur kulturën shqiptare dhe atë të huaj.
Pasqyrimi i gjinive të folklorit dhe vlerave të tij janë kryefjala e këtij festivali gjithashtu qëllimi i tij është të mbrojë dhe të promovojë në publikun e gjerë vlerat më të mira muzikore, koreografike, etnografike të krijuara prej shekujsh.
Parada e motiveve, ritmeve, ngjyrave, këngëve, valleve, riteve do të shpalosen në qytetin e gurtë, i cili pritet të këtë një numër të madh vizitorësh vendas dhe të huaj për të shijuar këto ditë festimesh.
Festivali i Gjirokastrës ka qenë i konceptuar në formën e një gare folklorike, i cili u zhvillua për herë të parë në vitin 1968 dhe konsiderohet si ngjarja më e rëndësishme në kulturën shqiptare.
Artistë të mirënjohur popullorë, interpretues brilant, që me talentin e tyre i dhanë zë, ngjyra dhe jetë, ndër vite, performancave folkorike nga të katër anët e Shqipërisë, kujtohen sot si krenaria e Festivalit Kombëtar të Gjirokastrës emra të tillë si Xhevat Avdallin, “Artist i merituar”, Laver Bariun, klarinetistin virtuoz, Ndue Shytin, “Artist i Popullit”, Demir Zykon, me zërin e një tenori lirik, Fatime Sokoli, “Artiste e Merituar” dhe “Mjeshtër i Madh”, Dervish Shaqja, “Artist i merituar”, Ali Kondi. “Artist i merituar”, Taip Madani, “Artist i merituar”, Mjeshtër i valleve elegante e plot kolorit të Çamërisë, Golik Jaupi. “Artist i merituar”, Fitnete Rexha. “Artiste e merituar” dhe të tjerë.
