Riorganizimi dhe reformat ishin kryefjalë e takimit dy ditor të qeverisë në Tepelenë.
Kryeministri Edi Rama foli vetë për mediat dhe tregoi diskutimet e gjata me ministrat, zëvendësministrat dhe drejtorët më të rëndësishëm të shtetit.
“Është diskutuar nevoja për të riorganizuar të gjithë procesin qeverisës që nga vetë organizmi i këtij procesi në godinën e qeverisë dhe kemi arritur disa rezultate të dobishme dhe kemi vendosur disa piketa të rëndësishme që sesionin e ri ta fillojmë një impuls të ri dhe rritje të kapaciteteve qeverisëse duke forcuar rolin e zv.ministrave dhe duke përfshirë në vendimmarrje edhe të tjerë drejtues të agjencive të rëndësishme.”
Teksa u pyet për vendimet e marra në asamblenë e Partisë Socialiste, ku Sekretari i Përgjithshëm Damian Gjiknuriu shkarkua bashkë me gjithë sekretariatin, Rama mohoi që kjo vendimmarrje të jetë ndikuar nga faktorë të jashtëm.
Sipas tij largimi i Gjiknurit nga posti i rëndësishëm në parti nuk lidhet me hetimet e SPAK për inceneratorët.
“Raportin tonë me drejtësinë e kemi bërë shumë të qartë. Lëvizja e të gjithë sekretarit nuk ka të bëjë aspak me atë që ndodhi me Damianin. Punën e tij e ka bërë shumë mirë, por unë kam besuar gjithmonë, që para të të vënë të tjerët në pozitën që ti të kuptosh çfarë duhet të bësh që të jesh mbi të tjerët, duhet ta bësh vetë. Të tjerët s’kanë parë nga vetja, dhe prandaj janë aty ku janë.”
Kryeministri Rama foli gjithashtu edhe për dixhitalizim të mëtejshëm të administratës, ku siç tha përdorimi i inteligjencës artificiale që do të ndihmojë në arsim, prokurimet publike dhe në përmirësimin e shërbimeve për qytetarët.
