Djali i presidentit të Kolumbisë është arrestuar si pjesë e një hetimi për pastrim parash dhe pasurim të paligjshëm. Lajmi është bërë me dije nga zyra e Prokurorit të Përgjithshëm të Kolumbisë në një deklaratë.
Duke iu përgjigjur lajmit për arrestimin e djalit të tij, presidenti kolumbian Gustavo Petro tha se ai ishte “i lënduar”, por garantoi se procedurat e ndjekjes do të ishin në përputhje me ligjin.
“Si njeri dhe baba, kaq shumë vetëshkatërrim dhe fakti që njëri nga fëmijët e mi shkon në burg më lëndon shumë. Si President i Republikës, siguroj se prokuroria ka të gjitha garancitë nga ana ime për të ecur në përputhje me ligjin”, shkruan Petro në llogarinë e tij zyrtare në Twitter.
Gustavo Petro vazhdoi duke i uruar të birit “fat dhe forcë” dhe përsëriti synimin e tij për të mos ndërhyrë apo bërë presion ndaj prokurorit të përgjithshëm në këtë rast.
Një urdhër arresti u lëshua gjithashtu kundër ish-bashkëshortes së Nicolas Petros, Daysuris del Carmen Vásquez Castro, “për krimet e pastrimit të parave dhe shkeljes së të dhënave personale për ngjarjet që kanë ndodhur nga viti 2022 deri më sot.
“Të kapurit do të vihen në dispozicion të një gjyqtari penal komunal me funksionin e kontrollit të garancisë, të cilit do t’i kërkohet t’i japë ligjshmëri procedurave të kërkimit, kapjes dhe sekuestrimit të elementeve materiale të provës. Në të njëjtën mënyrë do të ngrihet edhe akuza për krimet e sipërpërmendura dhe do të kërkohet masë kufizuese e lirisë”, thuhet në njoftimin e zyrës së Prokurorit të Përgjithshëm.
Nicolas Petro u vu nën hetim nga zyra e Prokurorit të Përgjithshëm në fillim të marsit për akuzat se ai kishte marrë para nga trafikantët e drogës, në këmbim të përfshirjes së tyre në përpjekjet e babait të tij për të ndërmjetësuar bisedimet e paqes me organizatat kriminale në Rajonin e Karaibeve.
Në një deklaratë më 2 mars, Petro mohoi akuzat ndaj tij, duke thënë se ato nuk ishin gjë tjetër veçse sulme politike dhe personale.
