Polonia ka vendosur të dërgojë më shumë trupa në kufi pasi helikopterët e Bjellorusisë shkelën hapësirën e saj ajrore.
Ky vendim i Varshavës vjen pas lëvizjeve të Bjellorusisë pasi dy helikopterë nga Bjellorusia shkelën hapësirën ajrore të Polonisë.
Lajmin e bëri të ditur Ministria e Mbrojtjes në një deklaratë për mediat.
Sipas deklaratës, Aleanca e Atlantikut të Veriut është informuar për incidentin dhe i ngarkuari me punë i Bjellorusisë u thirr për të shpjeguar situatën.
Ndërkaq, Shtetet e Bashkuara të Amerikës kanë deklaruar se nuk është në dijeni të ndonjë kërcënimi specifik që grupi i Vagnerit mund të paraqesë ndaj NATO-s.
Zëdhënësi i sigurisë kombëtare të Shtëpisë së Bardhë John Kirby ka theksuar se SHBA nuk janë në dijeni të ndonjë kërcënimi specifik të paraqitur ndaj Polonisë ose aleatëve të tjerë të NATO-s nga prania e forcave të Grupit Vagnerit në Bjellorusi.
Kirby tha në një konferencë se SHBA po vëzhgon situatën nga afër teksa një numër i paspecifikuar luftëtarësh të Vagnerit kanë filluar të stërvitin ushtrinë kombëtare të Bjellorusisë, duke bërë që Polonia të fillojë të lëvizë më shumë se 1 mijë trupa më afër kufirit.
Nga ana tjetër, presidenti i Bjellorusisë Alexander Lukashenko ka mohuar pretendimet e Polonisë se rreth 100 mercenarët e Vagner, të jenë afruar pranë kufirit polak.
“Dëgjova një ditë më parë se Polonia është trembur se gjoja një njësi prej 100 njerëzish janë afruar në kufi. Asnjë njësi e Vagnerit nuk është zhvendosur drejt kufirit. Dhe nëse e kanë bërë, ata e kanë bërë këtë vetëm për të përcjellë përvojën luftarake te brigadat, të cilat janë të stacionuara në Brest dhe Grodno”, tha Lukashenko gjatë një vizite pune në distriktin Kamenets, në rajonin jugperëndimor të Brestit.
