Ish-kreu i divizionit të kundërzbulimit të FBI-së në Nju Jork ofroi një ‘mea culpa’ trishtuese në gjykatën federale të Manhattan të martën – duke pranuar se ai komplotoi për të shkelur sanksionet e SHBA-së ndërsa punonte për një oligark rus.
Charles McGonigal – i cili dikur hetoi lidhjet e pretenduara të fushatës së Trump me Rusinë përpara se të ngatërrohej vetë– i tha gjykatës se i vinte keq që punoi për Oleg Deripaska, një miliarder rus dhe manjat biznesi.
“Unë e kuptoj se në çfarë rezultuan veprimet e mia dhe jam thellësisht i penduar,” tha McGonigal, 55 vjeç, në gjykatë, duke u përtypur ndërsa fliste. “Veprimet e mia kurrë nuk kishin për qëllim të lëndonin Shtetet e Bashkuara, FBI-në apo familjen dhe miqtë e mi.”
Ai pranoi se kishte futur në xhep më shumë se 17,000 dollarë për të ndihmuar Deripaskën të mbledhë fakte mbi një oligark rival rus.
Prokurorët federalë thanë se McGonigal po përpiqej gjithashtu të hiqte Deripaskën nga lista e sanksioneve të SHBA-së, ku ai ishte vendosur në vitin 2018 në lidhje me pushtimin e Krimesë nga Rusia.
Ai u deklarua fajtor për një akuzë të vetme për komplot për pastrim parash dhe shkelje të Aktit Ndërkombëtar të Fuqive Ekonomike Emergjente.
McGonigal, nga Neë York City, mund të përballet me deri në pesë vjet burg kur të dënohet nga gjyqtarja Jennifer Rearden më 14 dhjetor.
Pasi doli nga salla e gjyqit, ish-agjenti tha vetëm tre fjalë të shpejta për The Post: “Ndihem i lehtësuar!”
Prokurori i SHBA Damian ëilliams deklaroi se “Pas mandatit të tij si zyrtar i nivelit të lartë të FBI-së, i cili mbikëqyri dhe mori pjesë në hetimet e oligarkëve rusë, Charles McGonigal tani ka pranuar se iu shmang sanksioneve të SHBA-së duke i ofruar shërbime njërit prej atyre oligarkëve, Oleg Deripaska”.
“Kjo Zyrë do të vazhdojë të mbajë përgjegjës ata që shkelin sanksionet e SHBA-së për përfitimin e tyre financiar.”
Ndërkohë, avokati i McGonigal, Seth DuCharme, tha se klienti i tij “bëri gjënë e duhur”.
“Mendoj se ishte një zgjidhje e drejtë,” tha DuCharme. “Ai kishte një re të zezë mbi vete dhe retë kanë filluar të ndahen. Ai e ka pranuar përgjegjësinë.”
McGonigal, i cili drejtoi divizionin e kundërzbulimit të NYC nga viti 2016 deri në pensionimin e tij në 2018, u padit në janar për punë për Deripaska në 2021. Autoritetet e arrestuan atë në Aeroportin JFK disa javë pas fillimit të vitit të ri.
Ish-agjenti i posaçëm i ngarkuar ligjërisht duhej të raportonte në byro kontaktin e tij me zyrtarë të huaj. Në vend të kësaj, ai fshehu lidhjet e tij teksa bëri biznes dhe udhëtime që bien ndesh me punën e tij, sipas prokurorëve.
Ai fillimisht u deklarua i pafajshëm për katër pika: Komplot për të shkelur dhe shmangur sanksionet e SHBA, pastrim parash, komplot për të kryer pastrim parash dhe komplot për të shkelur ligjin federal kundër të bërit biznes me individë të sanksionuar.
McGonigal – i cili ka qenë i lirë me një garanci prej 500,000 dollarësh që nga arrestimi i tij – luajti një rol qendror në hetimin e byrosë ndaj ish-presidentit Donald Trump që çoi në një hetim të këshilltarit special për ndërhyrjen ruse në zgjedhjet e 2016-ës.
Aktakuza thoshte se ndërsa ai ishte ende në FBI, McGonigal mori informacion të klasifikuar që thoshte se Deripaska do të sanksionohej nga SHBA pas aneksimit të Krimesë nga Rusia në vitin 2014.
Deripaska – një manjat miqësor ndaj Kremlinit që themeloi gjigantin e aluminit Rusal – dyshohet se ishte hetuar për pastrim parash, përgjime, kërcënime kundër rivalëve të biznesit, zhvatje dhe shantazh, ndër të tjera.
Pasi McGonigal u largua nga byroja në vitin 2019, një firmë ligjore që luftonte sanksionet ndaj Deripaskës e punësoi atë për të “fshirë nga lista” oligarkun. McGonigal – së bashku me dy burra të tjerë – gjithashtu ranë dakord për një marrëveshje të vitit 2021, në të cilën ata paguheshin nga një bankë ruse për të hetuar një nga oligarkët rivalë të Deripaskës, thanë prokurorët.
Banka, me seli në Cypress, ia transferoi 17,500 dollarët një kompanie në Neë Jersey në pronësi të një prej miqve të McGonigal përpara se të përfundonte në llogarinë bankare të ish-agjentit të FBI-së.
McGonigal u padit veçmas në Uashington DC për fshehjen e 225,000 dollarëve në pagesa nga një ish-anëtar i shërbimit të inteligjencës së Shqipërisë dhe për një takim sekret me kryeministrin shqiptar Edi Rama ndërsa ai punonte për FBI-në.
Ai është deklaruar i pafajshëm në atë rast, i cili është në pritje të gjykimit.
