Në Shqipëri do të organizohet vitin e ardhshëm një nga garat e kampionatit botëror të Formula 1 me motoskafë, e njohur edhe si F1H2O.
Kryeministri Edi Rama njoftoi se Pogradeci do të jetë qyteti që në muajin korrik 2024 do të mirëpresë 43 skuadra nga e gjithë bota.
Gara në F1H2O zgjat mesatarisht 45 minuta dhe do të zhvillohet përgjatë pistës ujore të liqenit të Pogradecit, ku po punohet për të përmbushur kushtet e kërkuara teknike dhe të sigurisë.
“Dhe me FORMULA 1 të garave botërore të ujit, e cila vjen në Pogradec në korrik 2024, si pararendëse e FORMULA 1 në garat me makina, që do të vijë në Elbasan pas pak vitesh, kur të kemi përfunduar cirkuitin e kaluar të gjitha testet e kërkuara, ju uroj një ditë të mbarë,” shkroi kryeministri Rama në Facebook.
Kreu i qeverisë shtoi se ky zhvillim është në vazhdën e ofertave turistike që ofron Shqipëria dhe që e kanë ngjitur atë në një nivel të ri botëror.
F1H2O organizon gara në vende të ndryshme të botës, si Itali, Francë, Britani apo Abu-Dabi.
Drejtuesit e motoskafëve lëvizin nëpër kthesa e pengesa me mjetet e tyre, të cilat arrijnë shpejtësinë deri 250 km/orë.
