Dhoma e Përfaqësuesve republikan të SHBA, ka bërë me dije se do të hapë një hetim zyrtar për shkarkimin e Presidentit Joe Biden.
Lajmi është bërë i ditur nga Kryetari i Dhomës Kevin McCarthy, i cili ka deklaruar se hetimi ndaj Biden do të përqendrohet në akuzat për “abuzim të pushtetit, dhe korrupsion”.
Sipas raportimeve nga BBC, Republikanët kanë nisur hetimet ndaj presidentin që kur morën kontrollin e Dhomës në janar.
Mësohet se në seancat dëgjimore nuk është gjetur asnjë provë konkrete të sjelljes së pahijshme të presidentit Biden, megjithatë, hetime kanë zbardhur detaje mbi marrëdhëniet e biznesit të djalit të vetëm të presidentit, Hunter Biden.
Sipas hetimeve, republikanët thonë se rezultatet janë të diskutueshme dhe Biden është në dijeni të aktiviteteve të paligjshme të djalit të tij.
Ky është hapi i parë në një proces politik që mund të rezultojë në një votim në Dhomën e Përfaqësuesve, për shkarkim të Biden nga posti i Presidentit. Nëse kjo miratohet me një shumicë të thjeshtë, mund të pasojë një gjyq në Senatin e SHBA.
Në një deklaratë të shkurtër në Kapitolin e SHBA, zoti McCarthy tha se kishte akuza “serioze dhe të besueshme”, që përfshinin sjelljen e presidentit.
“Të marra së bashku, këto akuza paraqesin një pamje korrupsioni,” tha ai.
Ndërkohë djali i presidentit, Hunter Biden është aktualisht nën hetim për krime të mundshme tatimore.
