nga Skender Rusi
Nuk di se si
mua më humbi vdekja,
ndërsa isha duke ecur!
U ktheva ta kërkoj
e veç një këpucë ia gjeta,
Tjetra ku dihet
ku i kishte mbetur!
Ajo më vinte pas
ngado që unë bridhja,
S’më ndahej,
as kur bija për të fjetur!
Më deshte,po s’u bë dot kurrë ,
imja,
E ndoshta kurrë
s’ka për të më gjetur!
S’di se si
mua më humbi vdekja,
(Më ra rrugës
apo e hodha vetë!?)
Sidoqoftë,
unë njërën këpucë ia gjeta,
Por nuk ia jap,
që më,të mos më ndjekë!
