Ish-kryeministrja britanike, Theresa May ka deklaruar sot se nuk do të kandidojë për rizgjedhje, duke i dhënë fund një karriere 27-vjeçare në parlament. May, u bë e fundit në një varg të gjatë politikanësh të Partisë Konservatore që sinjalizuan largimin e tyre nga parlamenti lidhur me zgjedhjet që do të mbahen këtë vit. Sondazhet tregojnë aktualisht se partia qeverisëse pritet të humbasë pushtetin ndaj Partisë Laburiste të opozitës në Britani, rapotojnë mediat e huaja.
May u bë kryeministre në vitin 2016 pasi lideri i atëhershëm David Cameron dha dorëheqjen pas votimit tronditës të Britanisë për t’u larguar nga Bashkimi Evropian. Ajo u zgjodh nga Partia Konservatore për të zbatuar vendimin e paprecedentë, për të cilin paraardhësi i saj nuk kishte lënë asnjë plan. Por May dha dorëheqjen tre vjet më vonë, pasi nuk ishte në gjendje të dorëzonte Brexit-in sipas planit ose të gjente një mënyrë për ta shtyrë parlamentin të miratonte planin e saj të daljes, duke ia dorëzuar frenat Boris Johnson-it.
Që nga largimi nga detyra, ajo ka mbetur anëtare e parlamentit për zonën e saj elektorale në Anglinë juglindore, por ajo tha sot se fokusi i saj në përpjekjen për të luftuar skllavërinë moderne dhe trafikimin e qenieve njerëzore po merrte një kohë të gjatë.
“Për shkak të kësaj, pas shumë mendimeve dhe konsideratave të kujdesshme, kam kuptuar se, duke parë përpara, nuk do të mund ta bëja më detyrën time si deputete në mënyrën që besoj se është e drejtë dhe e meritojnë zgjedhësit e mi”, tha ajo për gazetën ‘Maidenhead Advertiser’.
Kryeministri aktual, Rishi Sunak nderoi May-n, duke e përshkruar atë si besnike të ashpër, një aktiviste të palëkundur dhe duke thënë se ajo përcaktoi se çfarë do të thotë të jesh një nëpunëse publike.
