Fundi i viteve ’80 e sidomos vitet ’90 të shekullit të kaluar ishin kohë e rëndë për shqiptarët e Kosovës. Suprimimi i autonomisë së asaj që ishte Krahina Autonome e Kosovës kishte bërë që shqiptarët të mos ishin të integruar në jetën institucionale të kohës e si rrjedhojë, gjendja politike, ekonomike dhe ajo e sigurisë ishin vështirësuar.

Një pjesë të asaj historie artisti Enver Rakovica e ka përthekuar nëpërmjet grafikave të teknikave të ndryshme. E bashkë me to, edhe vepra të viteve të fundit që pasqyrojnë një tjetër gjendje të Kosovës i ka prezantuar në Stamboll.

Në qendrën kulturore “Adasanat” në lagjen “Galatasaray” të Stambollit, nëpërmjet veprave të tij, Rakovica shpërfaq një tablo të dy kohëve të Kosovës. Janë 43 grafika të teknikave të ndryshme që do të qëndrojnë ekspozuara në Qendrën kulturore deri në ditën e 26-të të këtij muaji.

Rakovica, i cili ka përfunduar studimet për dizajn grafik në Universitetin e Prishtinës më 1987, në klasën e Shyqri Nimanit, ka thënë se një pjesë e veprave të ekspozitës datojnë nga vitet 1989-1996.

“Të gjithë kemi qenë në situatë të vështirë politike. Të gjitha kanë të bëjnë me një emocion të përzier. Emocion të vështirë. Janë abstrakte me përshkrime të ngjarjeve që kanë ndodhur në Kosovë”, ka thënë ai për veprat me formate 100 me 70 centimetra. Rakovica, i cili pas studimeve në Prishtinë do të përfundonte magjistraturën në universitetin “Mimar Sinan” në Stamboll, në klasën e profesorit Saim Teckan, pas viteve ’90 kishte pauzuar në krijimtari. E në vitet e fundit i është kthyer grafikës.

Duke pasur parasysh këtë fakt edhe ekspozita në Stamboll, që është hapur në ditën e 6-të të këtij muaji, është titulluar “Magma”, duke e përshkruar figurativisht artistin si një vullkan të fjetur që shpërthen në befasi.

Kuratori i ekspozitës, Memet Güreli, i cili është edhe bashkëthemelues i qendrës kulturore “Adasanat”, ka shkruar se përshtypjet e para për Rakovicën kur ishin takuar në vitet ‘90 kishin lidhje me precizitetin e tij, si dhe disiplinën në punë. Sipas kuratorit, pa mëdyshje këto ishte rezultat i edukimit të mirëfilltë profesional që Rakovica e kishte fituar si nxënës i shkollës së mesme në Beograd dhe më pas në studimet në Prishtinë.