Dhjetëra mijëra njerëz kanë protestuar kundër qeverisë së Viktor Orban në qendër të Budapestit të shtunën, të udhëhequr nga një avokat dikur i afërt me administratën, i cili kohët e fundit nisi një lëvizje politike që synon të sfidojë kryeministrin.
Sipas mediave të huaja, përcjell Telegrafi, protestuesit marshuan drejt parlamentit në motin jashtëzakonisht të ngrohtë pranveror, disa prej tyre duke thirrur “nuk kemi frikë” dhe “Orban jep dorëheqjen!”.
Shumë prej tyre mbanin ngjyrat kombëtare të kuqe-bardhe-jeshile ose mbanin flamurin kombëtar, simbole që partia e Orbanit i përdori si të tyren për dy dekadat e fundit.
“Këto janë ngjyrat kombëtare të Hungarisë, jo të qeverisë”, tha 24-vjeçarja Lejla, e cila udhëtoi për në Budapest nga Sopron, një qytet në kufirin perëndimor të vendit.
Marshimi u drejtua nga Peter Magyar, 43 vjeç, i cili dikur ishte i martuar me ish-ministren e drejtësisë të Orban, Judit Varga dhe i cili përfundimisht planifikon të formojë partinë e tij.
Tre protestues të intervistuar nga Reuters thanë se Magyar u bëri thirrje atyre sepse ai kishte qenë pranë qeverisë Orban dhe kishte njohuri të brendshme se si funksionon ajo.
Magyar u bë i njohur gjerësisht në shkurt, kur ai dha komente nxitëse për punën e brendshme të qeverisë. Ai akuzoi Antal Rogan, ministrin që drejton zyrën e Orbanit, për drejtimin e një makinerie të centralizuar propagandistike.
