Lideri i VMRO-DPMNE-së, Hristian Mickoski në një intervistë për Radion Evropa e Lirë në pyetjen nëse fiton në zgjedhjet a do të jetë kryeministër i Maqedonisë së Veriut u përgjigj se do të dilte gënjeshtar nëse do të thoshte se nuk do të ndodhë kështu, por theksoi se njëherësh askush nuk mund t’ia ndalojë të thotë se është nga Maqedonia, është maqedonas dhe flet gjuhën maqedonase.
Nuk mund ta injorojmë realitetin, por do të luftojmë ta ndryshojmë, thotë lideri i VMRO-DPMNE-së në intervistë.
“Këtë e kam thënë shumë herë në të kaluarën, mund ta përsëris edhe për të njëqindtën herë, por mendoj se do të ishte hipokrizi nëse ne flasim për diçka që është në kundërshtim me këtë realitet. Unë jam profesor Universiteti që është pjesë e sistemit arsimor të shtetit. Për fat të keq si rezultat i marrëveshjes kapituluese që e bëri Zoran Zaev edhe sot ky është realiteti dhe unë praktikisht ligjëroj në sistemin arsimor në kuadër të Ministrisë së Arsimit që është pjesë e Qeverisë së shtetit me mbiemrin e njëjtë. Marr pagë nga Ministria e Financave që është pjesë e Qeverisë në shtetit me mbiemrin e ri”, thotë ai.
Lidhur me mundësinë për të bërë koalicion me BDI-në, nëse VMRO-DPMNE fiton në zgjedhje, Mickoski thekson se kanë qëndrim parimor se do të bëjnë koalicion me çdo parti politike e cila do ta pranojë platformën e tyre, gjegjësisht programin politik.
“Do të ulemi, do të bisedojmë dhe do të negociojmë dhe pse jo edhe të koalicionojmë. Nuk kemi preferenca ndaj asnjërës, kemi relata me të gjitha partitë politike të cilat janë përfaqësuese të shqiptarëve, kemi me parti politike të cilat nuk janë përfaqësuese të shqiptarëve, por të etnive të tjera etj., kështu që do të kemi program në tryezë dhe vi za vi me këtë program, nëse gjejmë një pikë të lidhjes, pse jo”, theksoi lideri i VMRO-DPMNE-së.
Deri më tani nuk është i kënaqur prej asaj se si është duke shkuar hetimi për rastin Reket dhe vlerëson se ka keqpërdorim klasik dhe mbulim të inspiruesit real dhe skenaristit në të gjithë këtë rast.
“Por së shpejti, nëse shohim se ky proces po devijon nga realiteti, opinioni do të jetë dëshmitar i asaj që ka ndodhur në të vërtetë”, tha ai.
