Alyona Polyn, 44-vjeçarja që udhëheq një grup të njohur si “Shtrigat më të fuqishme të Perandorisë”, ka tërhequr vëmendjen e inteligjencës ukrainase, e cila pretendon se ajo ka lidhje me shërbimet sekrete ruse, FSB dhe SVR.
Ndërkohë, mediat perëndimore raportojnë se Polyn ishte konsideruar si një nga personat më të afërt të Putinit, e përshkruar shpesh si “shtriga e tij e preferuar”. Megjithatë, tani zyrtarët rusë, ashtu sikurse edhe Putin e kanë shpallur atë “ekstremiste”. Alyona, e njohur edhe me emrin Elena Sulikova, po përballet me akuza për fyerje të besimtarëve ortodoksë rusë.
Ajo pohon se fuqitë e saj magjike i ka trashëguar nga gjyshja dhe se me to ka mbështetur Putinin dhe fushatën e tij, duke realizuar rituale magjike për të dobësuar kundërshtarët e tij. Sidoqoftë, Polyn është marrë në pyetje nga FSB pasi iu gjetën sende të dyshimta si kukulla vudu, qirinj të zinj dhe statuja idhujsh.
Sipas raportimeve, zyrtarët kanë zbuluar gjithashtu lakuriqë nate të ngordhur, thika ritualesh dhe sfera kristali mes sendeve të saj. Këtë javë, autoritetet e Moskës e akuzuan atë për ekstremizëm dhe përçmim ndaj besimtarëve, duke e përfshirë në listën e të hetuarve.
Polyn bëri bujë në vitin 2019 kur drejtoi një grup shtrigash që kryenin rituale për mbështetjen e Putinit, me qëllim që kundërshtarët e tij “të zhdukeshin”. Në një prej thirrjeve të tyre thuhej: “Rusia do të ngrihet, duke ndjekur rrugën e drejtësisë së Vladimir Putinit përmes fuqisë së fjalës sime.”
Nga ana tjetër, Kievi pretendon se Polyn ka rekrutuar shtriga të tjera për të spiunuar mbi lëvizjet ushtarake të Ukrainës, sipas raportimit të mediave britanike.
